Memleket basshysy Qazaqstanǵa resmı saparmen kelgeni úshin Eýropalyq keńes tóraǵasyna rızashylyq bildirip, sapardyń Saıası qýǵyn-súrgin qurbandaryn eske alý kúnimen tuspa-tus kelgeniniń sımvoldyq máni baryn aıtty.
– Eýropalyq keńestiń qabyldaǵan jańa strategııasy men sizdiń saparyńyz Ortalyq Azııa elderiniń saıası-ekonomıkalyq ornyqty jáne qaýipsiz damýy úshin eýropalyq taraptyń múddeli ekeniniń dáleli, – dedi Qazaqstan Prezıdenti.
Qasym-Jomart Toqaev Donald Týsktiń sapary Nur-Sultan men Brıýssel arasyndaǵy dıalogqa tyń serpin beretinin atap ótti.
– Qazaqstan Ortalyq Azııa elderiniń ishinde Eýropalyq odaqpen «ekinshi býyn» kelisimine qol qoıǵan birinshi el boldy. Bul bizdiń baılanystarymyzdyń berik ekenin kórsetedi. Biz Eýropa elderiniń bárimen strategııalyq, seriktestik qatynastarymyzdy nyǵaıtýǵa belsendi atsalysamyz. Qazaqstannyń «Eýropaǵa jol» baǵdarlamasy men Eýropalyq odaqtyń Ortalyq Azııaǵa arnalǵan strategııasy ártúrli saladaǵy tabysty is-qımyldarymyzdyń úlgisi bolyp tabylady. Osy jetistikterdi eskere otyryp, Eýropalyq odaqpen yntymaqtastyǵymyzdyń keleshegi jaqsy bolatynyna senimdimiz, – dedi Memleket basshysy.
Donald Týsk jyly qabyldaǵany jáne Nur-Sultanǵa resmı saparmen alǵash kelýge múmkindik týǵyzǵany úshin Qazaqstan Prezıdentine rızashylyq bildirdi.
– Eýropalyq odaq Ortalyq Azııamen seriktestikti tereńdetý úshin óz strategııasyn aıqyndady. Qazaqstan – óńirdegi Eýropalyq odaqtyń negizgi seriktesi. Elderińiz Batys pen Shyǵystyń, Reseı men Ońtústik Azııanyń arasyndaǵy kópir bolyp sanalady. Eýropalyq odaq – Qazaqstannyń negizgi saýda jáne ınvestısııalyq seriktesi. Qazaqstanmen seriktestikti jáne yntymaqtastyqty keńeıtý týraly kelisimdi Eýropalyq odaq elderi jýyrda ratıfıkasııalaıdy. Biz ony júzege asyrýdy bastadyq, – dedi Eýropalyq keńestiń tóraǵasy.
Qasym-Jomart Toqaev pen Donald Týsk jýrnalısterge kelissóz barysynda jahandyq jáne óńirlik máseleler jóninde, sondaı-aq, energetıka, kólik jáne sıfrlyq kommýnıkasııa salalary boıynsha ekijaqty yntymaqtastyqty tereńdetý týraly keń kólemde jemisti pikir almasqanyn aıtty.