«Oqý jylynyń aıaqtalýyna oraı, búgin mektep, kolledj dırektorlarymen arnaıy məjilis ótkizdim. Oǵan memlekettik qyzmet isteri men sybaılas jemqorlyqqa qarsy is-qımyl departamentiniń ókilderi de qatysty. Məjiliste oqýlyq məselesinen bastap mektepterde jóndeý jumystaryn atqarý mindetteri talqylandy. Aldaǵy emtıhan kezeńi men mektepterdegi qarjy jınaý məselesi sóz boldy.
Qala əkimi Ǵabıdolla Rahmatollaulynyń tapsyrmasyna səıkes, Shymkentte úshinshi jyl qatarynan mektepterdegi aǵymdaǵy jóndeý jumystaryna bıýdjetten qarjy bólinedi. Ərıne, oqý jyly aıaqtalǵan soń, mektepter belgili bir deńgeıde jóndeýdi qajet etedi. Biriniń dýalyn syrlaý kerek bolsa, endi biriniń kafelin aýystyrý qajet. Bıyl mektepterdi aǵymdaǵy jóndeýden ótkizýge 260 mln teńge qaralyp otyr. Sondyqtan men barlyq ata-analarǵa, muǵalimderge, mektep dırektorlaryna resmı túrde məlimdeımin: Shymkent qalasynda qandaıda bir jeleýmen bolmasyn, qosymsha qarjy jınaýǵa qatań túrde tyıym salynǵan.
Biz úshin basty məsele - bilim sapasyn arttyrý. Biz búgingi oqýshylarǵa qandaı bilim bersek, bolashaq mamandyq ıeleri - dərigerler, tərtip saqshylary, óndiris mamandary, muǵalimderdiń qandaı bolatyny ózimizge baılanysty bolyp otyr. Sol sebepti muǵalimderdiń biliktiligin arttyrýǵa kóńil bólýdi tapsyrdym.
Búgin ərbir oqýshy úshin jaýapty kezeń - emtıhan tapsyrý naýqany bastalǵaly tur. Men jaýapty mamandarǵa bul kezeńdi shıelenistirmeı, qalypty jaǵdaıda ótkizýdi júktedim. Mektep bitirýshi túlektiń psıhologııalyq ahýaly oqýshynyń emtıhan tapsyrýyna kedergi keltirmeýi qajet ekendigin eskerttim.
Jazǵy maýsym - bul balalardyń tynyǵýy úshin tamasha kezeń. Al biz osy ýaqytty tıimdi paıdalanyp, balalarymyzdyń jańa oqý jylynda sapaly bilim alýlaryna jaǵdaı jasaýymyz qajet», - dep jazdy Q. Nurtaı Instagram paraqshasynda.