Qazirgi tańda el Úkimeti bekitken Jańaózen qalasyn áleýmettik-ekonomıkalyq damytýdyń keshendi josparyna saı jumystar qolǵa alyndy. Qala ákimi Á.Daýylbaevtyń aıtýynsha, 2025 jylǵa deıin Jańaózen qalasy aýmaǵynda 67 jobany iske asyrýǵa 230 mlrd teńge qarastyrylǵan. Atalǵan keshendi josparǵa saı bıylǵy jumystarǵa 19,6 mlrd qarjy jumsalatyn bolady. Jaldamaly páterler satyp alý, 18, 2 shaqyrym avtomobıl joldaryn salýǵa respýblıkalyq bıýdjetten 3,7 mlrd teńge bólinse, jergilikti bıýdjettiń 273,4 mln teńge qarajaty bıznes negizderine oqytý, avtomobıl joldaryn salý, apatty turǵyn úılerdiń turǵyndaryna páterler satyp alý jumystaryna, al «QazMunaıGaz» AQ, «О́zenMunaıGaz» AQ tarapynan beriletin 8,8 mlrd teńge jataqhana shyǵyndaryn sýbsıdııalaý, basqa óńirlerge qonys aýdarý shyǵyndaryn sýbsıdııalaý, QazGО́Z jańǵyrtý, «О́zenınvest» MKK-nan 350 jańa jumys oryndaryn qurý syndy jobalarǵa baǵyttalady.
Jańaózendegi eski úıler talaıdan beri taýsylmaı kele jatqan jyr ekeni belgili. Qala ákimi «jyrdyń» aıaqtalatyny týraly jaqsy áńgimeniń lebin sezdirip ótti.
– Jańaózen qalasyn damytýdyń keshendi jospary aıasynda bıyl 26 kópqabatty úı jóndeýden ótedi. Qalada 40 apatty jaǵdaıdaǵy úı bar, 500-ge jýyq turǵyn kezeń-kezeńimen jańa úılerge kóshiriletin bolady. Bul jumys bıyl bastalady. Apatty dep tanylǵan «Shańyraq» shaǵyn aýdanyndaǵy №43-úıdiń turǵyndaryn pátermen qamtamasyz etý maqsatynda qalǵan 10 páter satyp alýǵa «О́MG» AQ áleýmettik mindettemeler qarajaty esebinen 145,0 mln teńge bólý josparlanyp otyr. Sondaı-aq tozyǵy jetken 52 kópqabatty úıdiń 26-yna bıyl jóndeý jumystary bastalady, dedi О́ńirlik kommýnıkasııalar qyzmeti alańynda ótken brıfıngte Jańaózen qalasynyń ákimi Á.Qulyntaıuly.
Jańaózen qalasynyń muqtaj azamattary úshin Aqtaý qalasynan jalǵa beriletin páterler satyp alýǵa «О́zenMunaıGaz» AQ jáne respýblıkalyq bıýdjet qarajaty esebinen qarajat bólý josparlanǵan. Jalǵa beriletin páterler Jańaózen qalasynyń jumyssyzdyq tiziminde tirkeýde turǵandarǵa jáne elimizdiń aımaǵynda sońǵy 5 jyl ishinde atynda páterleri joq azamattarǵa beriledi. Budan basqa Jańaózen qalasynyń jastary ishinen Aqtaý qalasynyń jataqhanasyna ornalasýǵa nıet bildirgen azamattardyń tizimi jasaqtalyp, oblystyq ákimdikke joldanǵan. Jataqhanalarda turǵany úshin jalǵa alý tólemaqysyn sýbsıdııalaý boıynsha «О́MG» AQ qarajaty esebinen 236,3 mln teńge qarastyrylypty.
Baspana, sondaı-aq jumyssyzdyq máselesin retteýdegi erkimen qonys aýdarý baǵyty jáne respýblıkamyzdyń ózge óńirlerine kóshý boıynsha túsindirý jumystary júrgizilip, 38 adamnan turatyn 10 otbasy kóshýge nıet bildirgen bolsa, kóship baratyn óńirlerge qonys aýdarý shyǵystaryn sýbsıdııalaý boıynsha «О́MG» AQ qarajaty esebinen 20 mln teńge qarastyrylǵan.
Qaladaǵy jumyspen qamtý – ózekti másele. Osy oraıda Jańaózen qalasynda ashylatyn qant zaýyty, munaı qaldyqtaryn tapsyrý men munaı qaldyqtaryn tazalaý pýnkti júzdegen jańa jumys ornyn ashýǵa múmkindik beredi dep kútilýde.
– Jańaózen qalasyn damytýdyń keshendi josparynda 2019-2025 jyldar aralyǵyndaǵy qarastyrylǵan is-sharalardyń, ınvestısııalyq jobalardyń iske asyrylýynyń nátıjesinde 5 606 jańa jumys oryny qurylyp, qalanyń jumyssyzdyq máselesi sheshiletin bolady. Bul jumys oryndary ortalyq munaı tapsyrý pýnkti, qant zaýyty, elektr energııasyn óndiretin kásiporyn salý, turmystyq qaldyqtardy qaıta óńdeý kombınatynyń óndirisin keńeıtý, «kovorkıng» ortalyǵyn qurý arqyly júzege asatyn bolady.
Qumsheker óndiretin zaýyt salý úshin jeke ınvestorlar 86,6 mln teńge bólip otyr. Nátıjesinde 48 adam turaqty jumysqa ornalasady. Atalǵan jobany osy jyldyń aıaǵyna deıin iske asyrý josparlanǵan. Al ortalyq munaı tapsyrý pýnktin salý boıynsha «Tenge oıl gaz» JShS tarapynan jumystar júrgizilýde, qurylystyń birinshi kezeńi aıaqtalýǵa jaqyn, tolyq joba 2020 jyldyń sońyna deıin aıaqtalyp iske qosylǵanda, negizgi qurylatyn jumys ornyna 45 adamdy tartý josparlanǵan. Sondaı-aq mazýttalǵan topyraqty bıologııalyq tazartý boıynsha «О́MG» AQ qarajaty esebinen 995 mln teńge qarastyrylǵan. «Taza sý» JShS tarapynan jumystar bastalyp, nátıjesinde 54 azamat jumysqa joldandy. Qaladaǵy «Qazaq gaz óńdeý zaýytyn jańǵyrtý boıynsha «QMG» AQ 107,2 mlrd teńge josparlaǵan, joba iske asqanda qala turǵyndary úzdiksiz turaqty túrde gazben qamtamasyz etiletin bolady. Qalada qatty turmystyq qaldyqtardy qaıta óńdeý kombınatynyń óndirisin keńeıtý baǵytynda ınvestorlarmen 130 mln teńgeni quraıtyn kelissózder júrgizilip, osy jyldyń aıaǵynda iske asyrý kózdelgen. Jańaózen halqynyń ál-aýqatyn jaqsarta otyryp, munaı-gaz salasy kásiporyndarynyń turaqty jumysyn qamtamasyz etýge 693 jumys orny qurylady. Sondaı-aq Jańaózen qalasynda 350 jańa jumys orny ashylyp, jumyssyzdyq esebinde turǵan azamattar eńbekpen qamtyldy. Jáne de bıznes negizderi boıynsha jyl basynan beri 46 adam oqytylyp, sertıfıkattaryn aldy. Osy maqsatta jeke kásipkerlikke 38,5 mln teńge bólý josparlanyp otyr. Jańaózen qalasynyń óndiristik alańyn shaǵyn jáne orta bıznes jobalarymen toltyrýdy qamtamasyz etý boıynsha múliktik nysandy «Kaspıı» áleýmettik kásipkerlik korporasııasyna berý jumystary júrgizilýde. Qazirgi tańda bul baǵytta 37 kásipkerden usynys tústi. Sonymen qatar turǵyndardy sapaly úzdiksiz aýyzsýmen qamtamasyz etý maqsatynda Jańaózen qalasyndaǵy sý tazartý ǵımaratynyń qurylysy aıaqtalyp, paıdalanýǵa berildi, deıdi qala ákimi.
Jańaózen halqynyń ál-aýqatyn kóterý, qalanyń ekonomıkalyq ahýalyn jaqsartý – Úkimet nazarynda turǵan másele. Sondyqtan kópshilik kóp isterdiń qujat túrinde emes, bitken is túrinde paıdalanýǵa berilgen sátin asyǵa kútetini anyq.
Mańǵystaý oblysy