Beısenbi, 16 mamyr 2013 1:35
Ereýilderdi toqtatý baǵytyndaǵy qadam
Beıbit prosess sheńberinde Túrkııadan jiberilgen kúrd sodyrlarynyń birinshi toby 14 mamyr kúni Soltústik Irakqa keldi. Topty Kúrdistan jumysshy partııasynyń ókilderi qýanyshpen qarsy alǵan.
Beısenbi, 16 mamyr 2013 1:35
Ereýilderdi toqtatý baǵytyndaǵy qadam
Beıbit prosess sheńberinde Túrkııadan jiberilgen kúrd sodyrlarynyń birinshi toby 14 mamyr kúni Soltústik Irakqa keldi. Topty Kúrdistan jumysshy partııasynyń ókilderi qýanyshpen qarsy alǵan.
Bul sımvoldyq qadam Túrkııada osydan ondaǵan jyldar buryn bastalǵan ereýilderdi toqtatýǵa baǵyttalyp otyr. Kórgenderdiń aıtýlaryna qaraǵanda, arqalaryna qarý-jaraq pen rıýkzak asynǵan 13 erkek pen áıel túrik-ırak shekarasyndaǵy Metına taýyna jaqyn jerde ornalasqan Heror aýdanyna kelgen. Sodyrlardyń túrik kúrdteriniń túrmedegi lıderi Abdýlla Odjalan 8 mamyrda oq atýdy toqtatý týraly málimdeme jasaǵan soń, Túrkııanyń ońtústik-shyǵysyndaǵy óz pozısııalaryn tastap shyǵa bastaǵanyn aıta ketý qajet.
Esersoq áreket
Internet jelisinde osydan birneshe kún buryn jan túrshiktirerlik beınerolık ornalastyrylǵan. Onda «Omar ál-Farýk brıgadasy» atty ereýilshiler otrıadynyń kóshbastaýshylarynyń biri Abý Sakkardyń qaza tapqan úkimet áskerleri jaýyngeriniń ishki organdaryn sol jerde jep qoıý úshin kesip alyp jatqany beınelengen.
Ereýilshiler komandıri «Alla atymen ant etemin, biz senderdiń júrekterińdi julyp alyp, jep qoıatyn bolamyz», degen sózder aıtyp, óz áriptesterin de osyndaı áreketke barýǵa shaqyrǵan. Halyqaralyq buqaralyq aqparat quraldarynyń málimetteri boıynsha, atalǵan beınerolıktegi kannıbalızm aktisi osydan birneshe apta buryn oryn alǵan kórinedi. Beıne kórinis keń kólemdi qoǵamdyq rezonans týǵyzyp, kóptegen halyqaralyq uıymdar ókilderi ony aıyptaýda.
Berlýskonıdiń túrmege qamalýy múmkin
76 jastaǵy «sýǵa salsa batpaıtyn, otqa salsa janbaıtyn» Sılvıo Berlýskonıge túrmege túsý qaýpi tónip turǵan sııaqty. Italııa prokýratýrasy kámeletke tolmaǵan jezókshe Karıma Mahrýgtiń qyzmetin paıdalanǵany úshin sottan eldiń eks-premerin 6 jylǵa bas bostandyǵynan aıyrýdy surap otyr.
2011 jyldyń qarashasynda ózin otstavkaǵa ketýge májbúr etken osy is sheńberinde Berlýskonıge qyzmet jaǵdaıyn asyra paıdalandy degen aıyp taǵylyp, prokýrorlar oǵan ómiriniń sońyna deıin memlekettik qyzmet atqarýǵa tyıym salmaq nıette. Eks-premerdiń qorǵaýshysyna sóz maýsym aıynyń basynda berilmek. Al úkim sol aıdyń sońynda shyǵady dep kútilýde.
Saıasattaǵy sáıkessizdik kórinisi
Soltústik Koreıa Ońtústik Koreıa prezıdenti Pak Kyn Heniń Phenıanǵa qatysty saıasatyn ol Koreı túbegindegi daǵdarys ahýalyn tolyq túsinbeıtindigin kórsetti, deı otyryp «oǵash» saıasat dep ataǵan. Bul týraly soltústikkoreıalyq BAQ-tarǵa silteme jasaı otyryp, Renhap agenttigi habarlaǵan kórinedi.
Pak Kyn He joǵaryda keltirilgen sózdi AQSh-qa óziniń sapary kezinde ótken aptada aıtqan bolatyn. Ol ótken tarıhqa qurmetpen qaraı otyryp, óńirdiń úılesimdi damýyn qalaıtynyn jetkizgen. Al, KHDR-ǵa qatysty Ońtústik Koreıa memleketiniń basshysy ulttar qoǵamdastyǵynyń tolyqqandy múshesi bolý úshin Phenıan «durys tańdaý» jasaýy kerek dep atap kórsetken-di. Soltústikkoreıalyqtarǵa da dál osy sóz unamaı qalsa kerek.
66-shy Kann festıvali ashyldy
Fransııada kıno óneri salasyndaǵy eń basty oqıǵa – 66-shy Kann festıvali ashyldy. Kınobaıqaý úlken shý týyndatqan Frensıs Skott Fısdjeraldtyń romany boıynsha túsirilgen «Uly Getsbı» fılminen bastalady. Eske sala keteıik, basty rólde Leonardo Dı Kaprıo oınaǵan.
Bıyl Stıven Spılberg jıýrıge tóraǵalyq etse, oǵan Nıkol Kıdman, Krıstof Vals, Eng Lı jáne basqa da kıno qaıratkerleri kómek kórsetpek. Konkýrsqa 20 kınolenta qatysatyn bolady. Olardyń qatarynda Roman Polanskıdiń «Bylǵary kıgen Venera», aǵaıyndy Koenderdiń «Lıýın Devıstiń ishinde», Stıven Spılbergtiń «Kandelıabrler úshin», Fransýa Ozonnyń «Barlyǵy on jeti» jáne basqa da kınofılmder bar. 15 mamyrda bastalǵan halyqaralyq kınofestıval osy aıdyń 27-ne deıin jalǵasatyn bolady.
Nıgerııada tótenshe jaǵdaı jarııalandy
Radıkaldy ıslamısterdiń Nıgerııa aýmaǵyndaǵy yqpaly barǵan saıyn arta túsýde. El prezıdenti Gýdlak Djonattan birneshe shtatta tótenshe jaǵdaı jarııalaǵanymen, ázirge gýbernatorlardy qyzmetterinen alýdy josparlap otyrmaǵan kórinedi.
Jergilikti jýrnalıstermen kezdesýde Nıgerııa prezıdenti Adamava, Borno jáne Iobe shtattarynda tótenshe jaǵdaılar jarııalanǵanyn, oǵan ózi terrorshylar dep sanaıtyn ıslamıstik toptardyń qyzmeti sebepker bolǵanyn aıtqan. Ereýilshiler men terrorshylar memlekettegi jaǵdaıdy júıeli túrde turaqsyzdandyrýǵa talpynýda jáne onyń jaýyngerlik qabiletin synǵa alýda, dep atap kórsetken prezıdent. Aıta ketý kerek, Nıgerııa óńirdegi halqy eń kóp el, munda 160 mıllıon adam turady, olardyń ustanatyn dinderi de san-alýan.
Oq atýshynyń kim ekeni anyqtaldy
Jańa Orlean qalasynyń polısııasy ústimizdegi jyldyń 12 mamyrynda Ana kúnine arnalǵan qalalyq sherýde oq atty degen kúmándilerdiń kim ekendigin anyqtady. Onda 2 balany qosqanda 19 adam jaraqattanǵan bolatyn.
Polısııanyń málimetterine qaraǵanda, oq atýshy – 19 jasar Akeın Skott. Ony qaıǵyly oqıǵa kýágerleri tanyǵan kórinedi. Ázirge kúdikti bostandyqta júr. Sonymen birge, polısııa qyzmetkerleriniń aıtýynsha, esirtki men qarý-jaraq taratý jáne tutqynǵa alý kezinde qarsylyq kórsetýlerdi qosa alǵanda, A.Skottyń moınynda kóptegen qylmystar bar kórinedi. Quqyq qorǵaý organdary qyzmetkerleriniń úsh mekenjaıdy baqylaýda ustaǵanyna qaramastan, ázirge qylmyskerdi ustaýdyń sáti túspeı otyr.
Internet materıaldary negizinde ázirlendi.