Boksshylardyń Elorda kúnine tartýy

5 shilde kúni Alataý baýraıyndaǵy «Balýan Sholaq» sport saraıynda ótken boks keshiniń basty jekpe-jegi qazaqstandyq bylǵary qolǵap sheberi Qanat Islam (26-0, 20 KO) men Domınıkan Respýblıkasynyń boksshysy Hýlıo de Hesýs (27-2, 24 KO) arasynda ótken bolatyn. 

Atalǵan jekpe-jek bastalmas buryn, «Balýan Sholaq» sport ke­sheniniń ishine lyq tolǵan jankúıer kəsipqoı boksta baq synap júrgen bir top qazaqstandyq bylǵary qolǵap sheberleriniń ónerin tamashalady. Atap aıtqanda, Saparbaı Aıdarov (3-0, 2 KO) keshtiń shymyldyq ashar jekpe-jeginde ýkraınalyq qarsylasy Vladıslav Tansıýrany (2-3, 1 KO), О́zbekstan boksshysy Beksultan Raýshanov (5-1, 3 KO) ázerbaıjandyq Asqar Ragımovty (3-3, 1 KO), Berikbaı Nurymbetov (4-0, 0 KO) armenııalyq Karen Avetısıandy (9-25-4, 4 KO) upaı sanymen jeńdi. Sondaı-aq Arman Rysbek (6-0, 5 KO) ýkraınalyq Denıs Chechetany (9-14-2, 8 KO), debıýt jekpe-jegin ótkizgen Asqar Erý­bek (1-0, 1 KO) Belarýs boksshysy Andreı Sta­lıarchýkty (11-34-6, 2 KO) birinshi raýndtyń ózinde es­ten tandyryp, nokaýtpen jeńiske jetti. Taǵy bir debıýt jekpe-jegin ótkizgen aýyr salmaqtaǵy otandasymyz Nursultan Amanjolov (1-0, 0 KO) ýkraınalyq Pavel Krolenkodan (1-3, 1 KO) upaı sanymen basym tústi. Qazaq sport jýrnalıstıkasynyń ardageri Dúráli Dúısebaı boksshy Amanjolovtyń jekpe-jegin kórip, áleýmettik jelide qazaqtyń ǵalamat bylǵary qolǵap she­beri Áb­di­salan Nurmahanovtyń izba­sary ekenin jazdy. «Osy jigitke qarap otyryp, Ábdisalan Nurmahanov esime túsip ketti. Syrtqy turqy da, kes­kin-kelbeti de sol. Alda-jalda aǵamyz týraly kıno túsire qalsaq, este bolsyn degenim ǵoı. Iаǵnı, akterdi syrttan izdeýdiń qajeti joq», deıdi Dúráli aǵa.

Anderkardtyń faıt-kardynda tıtýldy jekpe-jekke shyqqan Aby­laı­han Qusaıynov (10-0, 7 KO) arme­nııalyq Garnık Arýtıýnıandy (3-2, 2 KO) úshinshi raýnda tehnıkalyq nokaýtpen jeńip (anyǵynda Arýtıýnıan aıqasty jalǵastyrýdan bas tartty), karerasyndaǵy tuńǵysh beldigin ıelendi. Sonymen qatar osy jekpe-jek úshin arnaıy AQSh-tan kelgen birinshi orta salmaqtaǵy jerlesimiz Madııar Əshkeev (13-0, 6 KO) ýkraınalyq boks­shy Igor Fanııanmen (16-21-3, 8 KO) judyryqtasyp, NBA belbeýin jeńip aldy. Tartysqa toly bolǵan jekpe-jekte otandasymyzdyń qabaǵy jarylyp, qan toqtamaǵan soń aıqastyń sýperfaızeri jarys erejesine sáıkes kezdesýdi jetinshi raýndta toqtatyp, jeńisti upaı sanymen alda turǵan Áshkeevke berdi. Al aýyr salmaqtaǵy Rýslan Myrsataev (6-0, 6 KO) bolsa, áıgili boksshy Maık Taısondy jeńgen brıtanııalyq Dennı Ýılıamsti (53-27, 40 KO) jekpe-jektiń tórtinshi raýndynda tehnıkalyq nokaýtqa túsirdi.

Al boks keshiniń basty jekpe-jegi joǵaryda aıtqanymyzdaı, Qanat Islam men domınıkandyq boksshy Hýlıo de Hesýs arasynda órbidi. Ol oǵan deıin ótkizgen 28 jekpe-jeginiń tek bireýinde ǵana jeńilgen, álemdik reıtıngte 320-orynda turǵan boksshy. Barlyq kezdesýlerin óz elinde ótkizip, birinshi ret shetelde judyryqtasqan boksshyny mamandar kezdesýge deıin Qanat Islamǵa laıyqty qarsylas emes dep baǵasyn berip tas­taǵan edi. On raýndtyq formatta ótken jekpe-jekte júlde retinde orta salmaqtaǵy WBO Inter-Continental tujyrymynyń beldigi tigildi. Bul aıqasta Qanat qarsylasyn bar-joǵy 14 sekýndta bir soqqymen sulatyp saldy. 

Qazir áleýmettik jeli qol­da­ný­shylary Qanattyń bul jeńisin ká­sip­qoı bokstaǵy eń jyldam jeńis pa, joq pa dep talqylap jatyr. Bir bile­ri­miz, Qanat óziniń karerasyndaǵy eń jyl­dam jeńis rekordyn jańartty. Otan­dasymyz 2012 jyly ekvadorlyq qar­sylasy Ýmberto Toledony birinshi raýnd­­tyń 33 sekýndynda sulatyp sal­­ǵan-dy.

Degenmen Qanat Islamnyń bul je­ńisine, qarsy­lasyna kóńili tol­ma­ǵan jankúıerler de tabylyp jatty. Sonyń biri – sport jýrnalıst Ne­sip Júnisbaı aǵamyz. Nesip Júnis­baı Qanattyń «qapshyq» qar­sylastarmen emes, óziniń deńgeıindegi qarsylastarmen judyryqtasatyn ýa­qyty kelgenin aıtady. «Men Qanatty Beıjiń Olımpıadasynan beri tanımyn. Onyń bokstaǵy jolyn únemi qadaǵalap otyramyn. Sol Beıjiń Olımpıadasynda kórgen Qanat men kútken shyńyna áli shyqqan joq. О́ıtkeni ony óz salmaǵyndaǵy myqtylarǵa salmaı keledi. Sonaý jer túbinen Almatyǵa kelip turyp, birinshi raýndtyń 14-sekýndynda murttaı ushatyn boks­shy kimge abyroı? Sol úshin de Qanatty aspanǵa kóterý kerek pe? Bul – ózegimizdi jaryp shyqqan óz balamyzǵa jasaǵan kóz baılaý, ótirik maqtaý jáne ony shyndyqtan adastyrý. Árıne, buǵan Qanat kináli emes. Oǵan qarsylas taýyp, bettestirip otyratyn komandasy kináli. Renish – solarǵa. Al búginde otyzdyń ortasyna kelgen Qanat aınalaıyn myqtylarmen qashan shaıqasady? Shaıqasyp úlgere me? Álde onyń komandasy sekildi bizge de jeńilmegen degen jelpildek ataq jete me? Sonda kimnen jeńilmegen? Keshegi ózin kórmek túgili atyn da estimegen Domınıkan Res­pýb­lıkasynan kelgen boksshy sekildi boskeýdelerden be? Meniń oıymsha, odan da Alvares sekildilermen shaıqasyp, jeńilip qalǵan áldeqaıda abyroıly bolar edi. Árıne, Qanatqa Alvaresti erteń eshkim bermeıdi. Sondyqtan da qarsylastyń eń aýyryn, eń sheberin tańdap, keskilesý kerek bul ónerde. Sonda ǵana kúshtiden kúshtige órleısiń», deıdi N.Júnisbaı. 

Sonymen 34 jastaǵy Qanat Islam óziniń 26-shy jekpe-jeginde jeńiske jetip, orta salmaqtaǵy WBO Inter-Continental beldigin ıemdendi. Nesip aǵamyz aıtyp ketkendeı, qazaq jankúıerleri endi Qanat Islamnyń ózine laıyqty qarsylas bolatyn, əlemdik kəsipqoı boksta aty shyqqan əldi boksshylarmen judyryq túıistirgenin qalaıdy.

Almatydaǵy boksshylardyń jeńis sherýin 6 shilde kúni elordada ótken boks keshinde judy­ryq­tasqan otan­das­­tarymyz da jalǵastyrdy. Sondaı-aq Nur-Sultanda ótken kási­bı boks ke­shiniń Almatydaǵy aıqas­qa qara­ǵanda júgi aýyr edi. О́ıtkeni jek­pe-jekti sheteldik promoýterler uıym­dastyryp qana qoımaı, boks­shylardyń aıqasyn AQSh-tyń ESPN+ telearnasy birneshe elge tikeleı efırde taratty. Sonymen qatar qazaq batyrlarynyń jekpe-jegin tamashalap, óz kózimen kórý úshin AQSh-tan áıgili promoýter Bob Arýmnyń ózi ar­naıy keldi. Arýmnyń kózine túsip, mu­hıt asqysy keletin otandastarymyz bul kezdesýde baryn saldy. «Barys Are­naǵa» kelgen jankúıerlerge tama­sha boks úlgisin kórsetý úshin de bylǵary qolǵap sheberlerimiz aıanyp qalmady.

Boks keshin ashyp bergen Abaı Tólesh (3-0, 2 KO) aýǵanstandyq Al­lah Ded Rahımımen (2-1, 0 KO) judy­ryq­tasyp, karerasynda birinshi ret qar­sylasynan tóreshiler sheshimi boıynsha basym tústi. Ábilqaıyr Sheǵa­lıev (6-0, 4 KO) ázerbaıjandyq Elvın Ahýndzadany (4-2, 2 KO) birin­shi raýndta eki ret, ekinshi raýndta bir ret nokdaýnǵa jibergenimen, Ahýndzada otandasymyzǵa laıyqty qarsylyq kórsetip, 8 raýnd boıy ju­dyryqtasty. Sheǵalıev upaı sanymen jeńiske jetti. Sultan Zaýyrbek (8-0, 6 KO) grýzııalyq Georgıı Gachechıladzeni (11-34-1, 5 KO) jetinshi raýndta tehnıkalyq nokaýtpen utty. Otandasymyz birinshi raýndta qar­sylasyn bir ret nokaýtqa jibergen bo­latyn. Álı Baloev (9-0, 7 KO) bra­zılııalyq Hamılton Ventýrany (15-7-1, 13 KO) upaı sanymen jeńse, Nurtas Ájbenov (6-0, 2 KO) grýzııalyq Achıko Odıkadzeni (18-11-1, 7 KO) kezdesýdiń birinshi raýndynda sulatyp saldy.

Tıtýldy jekpe-jekke shyqqan Vıktor Kotochıgov (10-0, 4 KO) mek­sı­kalyq Haıro Lopespen kezdesýde (24-11, 16 KO) tóreshilerdiń biraýyz sheshimimen jeńiske jetip, WBC International bel­digin ıelendi. Sondaı-aq Janqosh Tu­rarov (sýrette) (27-0, 17 KO) argen­tınalyq Maýro Maksımılıano Godoımen WBO Inter-Continental bel­beýi úshin ju­dyryqtasyp, 10 raýndqa josparlanǵan jekpe-jekte otandasymyz úshinshi raýndta tehnıkalyq nokaýtpen jeńiske jetti. 

Boks keshin tamashalaýǵa alys-jaqyn shetelden birneshe mártebeli meıman kelgenin de aıta keteıik. Olaryń qatarynda orta salmaqtaǵy álemniń eks-chempıony brıtanııalyq Bıllı Djo Sonders bar. Jekpe-jek sońynda Djo Sonders sharshy alańǵa kóterilip, Gennadıı Golovkınmen Nur-Sultan qalasynda kezdesý ótkizýge daıyn ekenin aıtty. «Qonaqjaı kóńili úshin Qazaq halqyna kóp rahmet aıtamyn! Qazaqstandaǵy boks jankúıerleri meni qatty tańǵaldyrdy. Men dál osy «Barys Arenada» Gennadıı Go­lov­kınmen judyryqtasqym keledi. Ol – uly chempıon, meniń onymen óz otanynda kezdesýge múmkindigim bar. Meniń promoýterim Frenk Ýorren aldaǵy ýaqytta maǵan qandaı jekpe-jek usynatynyn bilmeımin, biraq men osy jerde, «Barys Arenada» jekpe-jek ótkizgendi qalaımyn. Golovkın, men seniń óz Otanyńda jekpe-jek ótki­zýge usynys tastaımyn», dep muzaı­dynǵa jınalǵan jankúıerlerdi bir jelpindirip tastady.

Jalpy, elimizdiń eki bas qalasynda eki kúnge sozylǵan kásipqoı boks keshi jankúıerge jáne Elorda kúnine tamasha tartý boldy. Jekpe-jekke shyqqan barlyq otandasymyz jeńiske jetip, Qazaq elin jaýynger halyq retinda álemge kórsetti.