Jalpyulttyq sosıal-demokratııalyq partııasy jańa Konstıtýsııa jobasyn talqylaı otyryp, reformany tek zańnamalyq ózgeris emes, qoǵam men memlekettiń ózara jaýapkershiligin qaıta aıqyndaıtyn sheshim dep baǵalady. Partııa ókilderiniń aıtýynsha, zańdaǵy ózgerister azamattyń quqyǵyn qorǵap, bıliktiń ashyqtyǵyn kúsheıtý kerek, dep jazady Egemen.kz.
Partııa tóraǵasy Ashat Raqymjanov bul talqynyń máni memlekettiń bolashaq baǵytyna qatysty ekenin aıtty.
«Konstıtýsııa – normalar týraly áńgime emes. Bul – memleketti qalaı elestetemiz, onda adamnyń orny qandaı, qoǵamdyq kelisim qandaı qundylyqtarǵa súıenedi degen saýaldarǵa jaýap izdeý», dedi ol.
Onyń aıtýynsha, konstıtýsııalyq reforma memleket pen qoǵamnyń kemeldigin kórsetetin kezeń. Memleket qalyptasqan basqarý úlgilerin qaıta qarap, jańa talaptarǵa beıimdele alýy kerek, al qoǵam ortaq sheshimderge jaýapkershilikpen qaraýǵa tıis.
Jalpyulttyq sosıal-demokratııalyq partııa Ata zańnyń jańa jobasyn talqylady
Otyrysta jańa Konstıtýsııa jobasynyń ázirlený barysy ashyq formatta júrgeni atap ótildi. Bul úderiske sarapshylarmen qatar saıası partııalar, óńirler men azamattyq qoǵam ókilderi tartylǵan. Májilis depýtaty, JSDP Saıası keńesiniń múshesi Ajar Saǵandyqova usynylyp otyrǵan ózgeristerdiń adamǵa tikeleı qatysy bar ekenin aıtty.
«Konstıtýsııa týraly áńgimeni bir ǵana suraqtan bastaý kerek. Ol – «adamǵa naqty ne beredi?» degen suraq. Kez kelgen reforma osy ólshemmen baǵalanýǵa tıis», dedi depýtat.
Onyń sózinshe, jańa redaksııa azamattardyń quqyqtary men bostandyqtaryn qorǵaýǵa baǵyttalǵan naqty tetikterdi kúsheıtedi.
Jańa Konstıtýsııa jobasyn halyqqa túsindirý: Arandatýshylar zań aldynda jaýap beredi
О́ńirlik fılıaldardyń ókilderi de reformanyń mazmunyna toqtaldy. Astana qalalyq fılıalynyń tóraǵasy Talǵat Omarov jańa Konstıtýsııa el damýynyń uzaqmerzimdi basymdyqtaryn aıqyndaıtynyn aıtty.
«Jobada ǵylym, bilim, mádenıet jáne adamı kapıtaldy damytýǵa basymdyq berilgen. Bul – ulttyń bolashaǵyna salynǵan ınvestısııa», dedi ol.
Atyraý oblystyq fılıalynyń tóraǵasy Nuraınash Kamalova konstıtýsııalyq ózgerister óńirlerdiń usynystarymen qalyptasqanyn atap ótti.
«Konstıtýsııa qoǵammen birge damýy kerek. О́ńirlerden túsken usynystar júıelenip, Konstıtýsııalyq komıssııaǵa joldandy», dedi ol. Aıtýynsha, bir palataly parlamentke kóshý jáne partııalyq saılaý júıesi saıası jaýapkershilikti arttyrady.
Almaty oblystyq fılıalynyń tóraǵasy Nurym Nurlybekov Konstıtýsııa normalarynyń óńirlerdegi ómirmen qalaı ushtasatyny mańyzdy ekenin aıtty.
«Bul talqylaý tek ınstıtýttar týraly emes. Áńgime naqty qala men aýyldaǵy adam úshin memlekettiń qandaı bolatyny jaıly», dedi ol. Onyń sózinshe, áleýmettik jáne eńbek máseleleri óńirlerde aıqyn seziledi.
Konstıtýsııalyq reforma aıasyndaǵy perspektıvalar
Jıyndy qorytyndylaǵan JSDP ortalyq apparatynyń basshysy Maqsut Nasıbýlov partııa jańa Konstıtýsııa jobasyna jan-jaqty taldaý júrgizgenin aıtty.
«Jańa Konstıtýsııa jobasy JSDP usynǵan birqatar qaǵıdatty bastamalardy qamtıdy. Olardyń qatarynda bir palataly parlamentke kóshý, parlamenttiń bıýdjettik ókilettikterin keńeıtý, saılaý júıesindegi artyq shekteýlerdi azaıtý, saıası áralýandyq pen beıbit jınalystar quqyǵy bar», dedi ol.