Toǵyz jasynda jasalǵan operasııadan soń qos janarynan aıyrylǵan Saıda sol sátten bastap mýzykany janyna serik etti. Sodan beri esh qıyndyqqa qaramastan talaı shyńdardy baǵyndyryp, 13 jasynda týǵan qalasynda eń alǵashqy jeke konsertin berdi. Ol eshqashan «Mýzykant bolamyn» degen armanynan aınyǵan joq. Mektepti úzdik bitirip, «Bolashaq» baǵdarlamasymen shetelde oqydy. Saýsaǵynan saz tamǵan sheber pıanıst Saıda Qalyqova qazirgi ýaqytta Nur-Sultan qalasynyń Memlekettik fılarmonııasynda qyzmet etedi. «Meniń bilimge degen qushtarlyǵym maǵan barlyq kezdesken qıyndyqtardy jeńip shyǵýǵa kómektesedi», dep bastaǵan áńgimesinde ol elimizde aýdıo kitaptardyń az ekenin de tilge tıek etti.
Alaıda shetelde oqyǵanda mundaı qıyndyqtar bolmaǵanyn aıtady. «Italııaǵa oqýǵa kelgende, rektor meni teorııalyq sabaqtarǵa qalaı daıyndalady eken dep oılaǵan eken. Sony birden oılastyryp, Ýnıversıtet dıdaktıkasy degen bólimmen aqyldasyp, eń qajetti dep sanaǵan aýdıo kitaptardy daıyndap shyqty. Olar meniń múmkindigi shekteýli ekenimdi bildirmeı, barlyq aýdıo kitaptardy maǵan berdi. Sondaǵy meniń qýanyshymdy sózben aıtyp jetkizý múmkin emes. Basqalary 10-15 mınýt tapsyrsa, men 35 mınýt boıy emtıhan tapsyrdym. Olar meniń ıtalıan tilin óte jaqsy meńgergenime tańdanyspen qarady, tipti meniń basqa ult ókili ekenime senbedi», dedi ol kókiregin qýanysh kernep. Ol sońǵy emtıhanda jeke jáne orkestrdiń súıemeldeýimen eki baǵdarlama oryndady. Sóıtip mýzyka akademıgi dárejesin ıelendi.
Sondaı-aq ol tek oryndaýshy ǵana emes, 20-dan astam týyndynyń avtory. Italııa, Rýmynııa, Reseı memleketterinde óner kórsetken Saıda bıyl óziniń mýzyka álemindegi 20 jyldyq mereıtoıyn Nur-Sultan qalasynda atap ótti. Sonymen qatar onyń keshi Almatyda sondaı-aq, Túrkııada ótti.
«Búginde keı jastar kóp nársege shaǵymdanyp jatady. Alaıda ol áste durys emes. О́ıtkeni bilim, ǵylym úırený eshbir aqyny talap etpeıdi. Tek keregi – ynta men yqylas, umtylys pen izdený» degen Saıda aǵylshyn tilimen birge, ıtalıan tilin de jetik meńgergen. Tipti mektepte ıtalıan tilinen dáris te bergen. «Birde Oksfordtan kelgen oqytýshy astanamyzda bolǵan 2 kúnniń ishinde jastarmen tek aýdarmashy arqyly sóıleskenin aıtty. Alaıda menimen aǵylshynsha sóıleskende, ol kóp nárseni tereńnen qozǵap, pikir almastyra alǵanyna qýandy. Rasymen, aýdarmashy arqyly sóılesý men sol tildiń ózinde oı almasý tipti eki bólek nárse desek te bolady. «Bir til bilseń – bir adamsyń, eki til bilseń - eki adamsyń». Kóp tildi meńgergenniń bilimi men dúnıetanymy da keńeıe túsetini ras» dep, oı bólisken ol jastardy til úırenýge shaqyrdy.
Saıda áńgimesin taǵy bir qyzyqty jaıtpen ári qaraı jalǵap, ıtalıan tilinen aýdarmashy bolyp júrgeninde Daýn aýrýyna baılanysty konferensııa ótkenine toqtaldy. «Sonda shetelden kelgen sarapshylar balanyń qolyna shulyq kıgizip, qalam ustatý keregin aıtty. Al bizdegi bir muǵalim qolǵap kıgizýge de bolady ǵoı dedi. Men sarapshylarǵa osyny aıtqanymda, olar shulyq kıgizýdiń qanshalyqty paıdaly ekenin jiliktep túsindirip berdi. Eger men de osyny quptap, nazar aýdarmaǵanymda, oqıǵa basqasha órbir edi. Iаǵnı, bul jerden tildi bilý men túsinýdiń taǵy bir artyqshylyǵyn kórýge bolady», deıdi Saıda.
Saıdanyń armany kóp. Tipti keıbirine sizdiń qııalyńyz da jetpeıdi. «Meniń bir armanym – shetelderde shyǵarmashylyq keshimdi ótkizip, Qazaqstannyń atyn asqaqtata túsý», dedi ol. Osy sátte Saıdanyń anasy da áńgimemizge aralasty. «Saıda alǵa qoıǵan maqsattardyń qıyndyǵyn oılamaıdy, tipti elemeıdi de, tek ony oryndaý jolynda talmaı eńbektenedi», deıdi anasy. Biz de onyń ásem kompozısııalary álemniń talaı úzdikteri baǵyndyrǵan Londonnyń, Fransııanyń úlken zaldarynda shyrqalatynyna shyn júrekten tilektestigimizdi bildirdik.