Is-shara Ulttyq Olımpıada komıtetiniń qoldaýymen jas sportshylardy 2020 jylǵy Lozannadaǵy qysqy jasóspirimder Olımpııa oıyndaryna daıyndaý aıasynda ótedi. Jarystar 2019 jyldyń 5-20 jeltoqsan aralyǵyna belgilengen jáne osy jylǵa arnalǵan sporttyq-buqaralyq is-sharalardyń biryńǵaı respýblıkalyq kúntizbesine engizilgen. Nur-Sultan qalasyndaǵy aýqymdy balalar men jasóspirimder jarystarynyń uıymdastyrýshysy – Elena Hrýstalevanyń Olımpıadalyq qory. Festıvaldiń bas seriktesi – Olımpıadalyq qozǵalystyń kópjyldyq seriktesi «Koka-Kola» kompanııasy.
– 2020 jyldyń 10-19 qańtar aralyǵynda ótetin Lozannadaǵy qysqy jasóspirimder Olımpııa oıyndary 70 memleketten kelgen qatysýshylardy jınap, tarıhta úshinshi márte ótkiziledi. Eń alǵash 2016 jyly Norvegııanyń Lıllehammer qalasynda ótken dodada Qazaqstan quramasynan 17 sportshy qatysyp, bir kúmis jáne úsh qola medal jeńip aldy. Belsendi jattyǵýlardyń arqasynda jáne osy jańashyl ári qazaqstandyq jasóspirimder sportyn damytý úshin óte qajet festıvaldiń ótkizilýi arqasynda bizdiń sportshylarymyz kelesi jyly odan da joǵary nátıje kórsetedi dep úmittenemin, – dep atap ótti Qazaqstan Respýblıkasy Ulttyq Olımpıada komıtetiniń resmı ókili Jiger Azbergenov.
Is-sharanyń basty mindetteriniń biri – óskeleń urpaq arasynda salamatty ómir saltyn nyǵaıtýǵa yqpal etý, ony álemdik Olımpıada qozǵalysynyń qundylyqtaryna kiriktirý jáne qazaqstandyq jas atletterge maýsymnyń basty jarystaryna daıyndalýǵa kómektesý.
– Biz jas sportshylar úshin aýqymdy, ári kórkem festıvaldi uıymdastyrýdy jáne eń joǵary deńgeıdegi jarystardy ótkizýdi josparlap otyrmyz. Olar balalar arasynda Olımpıada rýhyn dáripteý jáne el namysyn túrli deńgeıdegi halyqaralyq jarystarda qorǵaıtyn laıyqty sportshylardy daıyndaý maqsatynda uıymdastyrylady. Biz bul jarystar jyl saıyn ótkizilip, tanymaldylyqqa ıe bolady jáne turaqty negizde sporttyq-buqaralyq is-sharalardyń biryńǵaı respýblıkalyq kúntizbesine enedi dep úmittenemiz. Festıvaldi uıymdastyrý jáne ótkizý bastamasyn Olımpıada chempıondary men júldegerleri Vladımır Smırnov, Lıýdmıla Prokasheva, Iýlııa Galysheva, sondaı-aq osy sport túrleri boıynsha barlyq federasııalar qoldady, – dep túsindirdi Elena Hrýstaleva.
О́z formaty, uıymdastyrý deńgeıi, sporttyq baǵdarlamasy jáne ótkizý tártibi boıynsha jasóspirimder jarysy óte qyzyqty jáne tartymdy bolmaq. Barlyq negizgi is-sharalar Nur-Sultan qalasyndaǵy «Alaý» muz kesheninde ótedi. Ashylý saltanatyna ataqty qazaqstandyq sportshylar men olımpıadashylar, Ulttyq Olımpıada komıteti, Qazaqstan Respýblıkasy Mádenıet jáne sport mınıstrligi men qala ákimdigi basshylarynyń qatysýy josparlanǵan.
Elena Hrýstalevanyń Olımpıadalyq qory sportsúıer jastardy qoldaý, halyqaralyq jarystar aldynda qajetti jattyǵýlar men jarys tájirıbesin qamtamasyz etý maqsatynda, sondaı-aq turǵyndardy belsendi ómir saltyna tartý boıynsha buqaralyq is-sharalardy ótkizý úshin qurylǵan. Qory quryltaıshylary qatarynda ataqty qazaqstandyq sportshylar – frıstaıldan qazirgi álem chempıony Iýlııa Galysheva men ataqty alpınıst Maqsut Jumaev ta bar.