Al quzyrly oryndar bolsa olarǵa bıznes álippesin úıretý, qarjylyq qoldaý kórsetý boıynsha keńes-kómek kórsetip keledi. Osy baǵytta jýyrda Azııa damý bankiniń qoldaýymen «Atameken» UKP «Aýyldyq jerlerde áıelder kásipkerligin damytý» atty tegin sheberlik sabaǵyn – Aqtaýda aýyldyń kásipker áıelderine arnalǵan semınar ótkizdi. Áıelder kásipkerligin qoldaý, sondaı-aq aýyl áıelderiniń áleýmettik-ekonomıkalyq áleýetin damytý baǵytyndaǵy semınarǵa oblystyń barlyq aýdanynan 60-tan astam áıel kásipker qatysty. Olardyń qatarynda sharýa qojalyqtarynyń, óndiristik kásiporyndardyń basshylary men jeke kásipkerler bar.
– Eki kúndik oqytýda bıznes-trener tájirıbelik tapsyrmalar men keıster arqyly áıelderdi kásipkerlik negizderine, býhgalterlik jáne basqarý esebine úıretip, salyq pen ınvestısııa tartý suraqtaryna jaýap berdi. Sonymen birge tyńdaýshylar jeke brendti damytýdyń mańyzdylyǵyn, pıar jumysyn úılestirý men ınternet-marketıng negizderi týraly tolyq úırenip, bildi, deıdi «Atameken» UKP basqarýshy dırektory, áleýmettik bastamalar departamentiniń dırektory Saltanat Ábdikárimova.
Oqytý aıasynda qatysýshylarǵa Qazaqstanda bıznesti júrgizýdegi qarjylaı jáne qarjylaı emes qoldaý týraly Kásipkerler palatasynyń mamandary tanystyrdy. Al kásipkerlikti qoldaý baǵdarlamalary jóninde «Damý» kásipkerlikti damytý qory» AQ óńirlik fılıalynyń qyzmetkerleri keńinen toqtaldy.
Sonymen birge ekinshi deńgeıli bankter men shaǵyn nesıelik uıymdardyń ókilderi názik jandy iskerlerge shaǵyn jáne orta bıznes sýbektileriniń jobalaryn qarjylandyrý baǵdarlamalary men olarǵa qatysý sharttaryn túsindirdi.
Qatysýshylar óz kezeginde semınardyń kásibı biliktilikterin kóterý úshin qajetti shara ekenin, sondaı-aq aýyldyq jerlerde jappaı kásipkerlikti damytý ıdeıasyn tanymal etýdiń mańyzdylyǵyn atap ótti.
– 3 mln teńge nesıe alyp, mal sharýashylyǵyn jaqynda bastadym. Ulttyq ónimderdi, shubatty satylymǵa shyǵaratyn oıym bar. Mańǵystaý aýdanynan 12 kásipker kelip otyrmyz. Semınarǵa kelgenime óte qýanyshtymyn. Bıznes qurý, ony damytý, qarajatty durys jumsaý, bankrotqa ushyramaý ádisterin úıretti, – degen oıymen bólisti kásipker Sáýle Býsahanova.
Áıel kásipkerlerdiń qatysýymen óńirde qurylys, dárigerlik qyzmet kórsetý, demalys aımaqtary, ózge de iri salalarmen birge úı turmysyna, azyq-túlikke, sondaı-aq ulttyq úlgidegi buıymdarǵa qatysty kásipkerlik damıdy dep kútilýde.
Mańǵystaý oblysy