Bul oraıda ǵylymdaǵy oń ózgeristerdi de atap ótken oryndy. Máselen, qazaqstandyq zertteýshilerdiń jańa býyny san alýan jobalardy birlesip júzege asyrýǵa daıyn. Atap aıtsaq, 2016 jyly sheteldik oqý oryndaryn támamdaǵan bir top PhD túlekteri Nazarbaev Ýnıversıteti janynan Jas ǵalymdar qaýymdastyǵyn qurdy. Atalǵan jobanyń túpkilikti maqsaty – ǵylymı ortadaǵy yntymaqtastyqty nyǵaıtý, sondaı-aq jas ǵalymdarǵa tájirıbe almasyp, birlesken zertteýler júrgizýge múmkindik berý.
2018 jyly Nazarbaev Ýnıversıtetiniń Áleýmettik damý korporatıvtik qorynyń qoldaýymen Jas ǵalymdar qaýymdastyǵy jumys formatyn ózgertti. Qazir bul qaýymdastyq Jas ǵalymdar alıansy retinde jańǵyryp, Qazaqstandaǵy jetekshi bilim ordalarynyń zertteýshilerin biriktirip qana qoımaı, sheteldegi otandastarymyzdy da ózderine tarta bildi.
Búgingi tańda alıanstyń belsendileri memlekettik vedomstvolarmen jáne birqatar kompanııalarmen baılanys ornatyp keledi. Olardyń qatarynda «Samuryq-Energo», «Shell» jáne «Chevron» syndy bedeldi kompanııalar bar. Osylaısha, jas ǵalymdarǵa naqty óndiristik máselelerdi sheshýge jol ashylyp otyr. Jas entýzıastar munymen toqtamaı, bıyl ǵalymdarǵa arnalǵan qosymshany ári ǵylymı zertteýdi endi bastaǵan jandarǵa oqytý kýrsyn daıyndap shyǵarmaq nıette.
Tutastaı alyp qarasaq, Jas ǵalymdar alıansynyń jumysy qazaqstandyq zertteýshilerdiń yntymaqtastyǵyna tyń serpin bereri sózsiz. Sol sekildi bul jańa ıdeıalardyń túrlenýine yqpal etip, otandyq ǵylymǵa degen ishki jáne syrtqy suranysty arttyrady dep úmittenemiz. Slıamjar Ahmetjarov, Prezıdent janyndaǵy QSZI-diń Áleýmettik-saıası zertteýler bóliminiń ǵylymı qyzmetkeri