Qaraǵandylyq teatr repertýaryndaǵy jańa spektaklderiniń biri – M.Dýnaevskııdiń «Alqyzyl jelkender» qoıylymy. Týyndynyń negizgi ıdeıasy – ár adamnyń jaqyny úshin ǵajap dúnıeler jasaı alatyndyǵy týraly berik senim men asqaq arman.
Basty keıipker – nebári segiz aılyǵynda anasynan aıyrylǵan Assol esimdi qyz. Ol óziniń ákesi – teńizshi Longrenmen birge Kaperna aýylynda turǵan. Ákesi qyzmetinen ketkennen keıin kishkentaı qyzy men óziniń kún kórisi úshin asqan sheberlikpen túrli shaǵyn jelkender jáne kemelerdiń modelderin jasap, satýmen aınalysa bastaıdy. Bir kúni segiz jasar Assol qolyna óziniń kishkene kemesin ustap turǵan beıtanys adamdy kórip qalady. Bul – «óleńder, ańyzdar, áńgimeler men ertegiler jınaýshy» qart Egl edi. Ol oıynshyqty Assolge berip, talaı jyldar ótken soń, qyz boıjetkende, oǵan dál osyndaı alqyzyl jelkendi kemede hanzada kelip, alys elge alyp ketetinin aıtady.
Aleksandr Grınnyń attas hıkaıatynyń jelisimen M.Bartenev pen A.Ýsachev lıbretto jazǵan. Qoıýshy rejısseri – «Zolotaıa maska», «Jyl adamy», «Melpomena», «Jyl áni» syılyqtarynyń ıegeri Sýsanna Sırıýk (Sankt-Peterbýrg, Reseı), mýzykalyq jetekshisi – Janna Shestakova, bas hormeısteri – «Qurmet» ordeniniń kavaleri Tatıana Shtykova.
Elena Ezerskaıanyń lıbrettosy jelisimen I.Kalmannyń «Baıadera» klassıkalyq operettasynyń qoıylymy oqıǵalar jelisiniń erekshe ári jarqyn usynylýymen ózgeshelenedi.
Bıshi-baıadera Odetta úndi hanzadasy Radjamıge essiz ǵashyq, al jigit bolsa, qyz úshin lagorlyq knıazderdiń sheteldik arýlarǵa úılenýge tyıym salatyn ejelden qalyptasqan zańdaryn attap ótýge daıyn. Sóıtip Hanzada taqtan bas tartady, al Odetta úlken qurbandyqqa barady: sóz salǵan jigittiń betin qaıtaryp, oǵan degen seziminiń joqtyǵyn bildiredi. Ǵashyqtardyń júregi jaraly, kóńili túsken Radjamı ketýge yńǵaılanady, al Odetta bolsa, jasaǵan amalynyń teristigin túsinedi. Biraq kenetten nekelerine ruqsat beriledi. Operetta janrynyń erejelerine sáıkes sońynda keıipkerler baqytqa keneledi.
Spektakldyń mýzykalyq jetekshisi ári dırıjeri – Valentın Bogdanov, rejısseri – Lıýdmıla Naletova (Máskeý, Reseı), bas hormeısteri – Tatıana Shtykova.