Google-dyń saıasatkerler synyna túsýi alǵashqy jaǵdaı emes. Maýsym aıynda-aq Eýroodaq AQSh-tyń haıtek kompanııasyna 1,7 mlrd AQSh dollary kóleminde aıyppul salǵan edi. Eýropalyqtar kompanııany monopolııaǵa qarsy erejelerdi buzdy dep aıyptaǵan bolatyn. Eýrokomıssııanyń sońǵy jyldary Google-ge salǵan aıyppul kólemi 9 mlrd AQSh dollaryn qurap otyr. Sol kezde AQSh prezıdenti kompanııaǵa arasha túsip, olarǵa óz elinde jazasyn beretinin aıtqan edi. Degenmen Eýroodaq aldynda aqtap alýǵa tyrysqan kompanııaǵa bul joly AQSh prezıdentiniń renishi qatty. Donald Tramptyń ókpesine óziniń keńesshisi ári tanymal ınvestor, PayPal tólem qyzmetiniń negizin qalaýshylardyń biri Pıter Tıldiń málimdemesi túrtki bolǵan. D.Tramp óziniń Twitter-degi paraqshasynda «Bul isti basqalardan jaqsy biletin alǵyr jigit. Tramp ákimshiligi bul aqparatpen tanysyp shyǵady» dep, kásipkerdiń kúmánin qoldaıtynyn jáne oǵan senetinin jazǵan bolatyn.
Pıter Tıl Vashıngtonda ótken konservatorlar konferensııasynda alyp kompanııanyń keı áreketteri kúdik týǵyzatynyn aıtqan bolatyn. Kásipker kompanııany Qytaıdyń arnaıy agenttikterine qyzmet kórsetedi dep aıyptap otyr. Byltyr jelide Google Qytaı zańnamasyna sáıkes bolatyn izdeý júıesin daıyndap jatqany týraly aqparat taraǵan edi. Biraq derekkózder bul joba tolyq aıaqtalmaı, 2018 jyly jeltoqsanda toqtap qalǵanyn jazdy. Al Google kompanııasynyń ókilderi sol kezde bul málimetti joqqa shyǵaryp, CNBC arnasyna Qytaı úkimetimen eshqandaı seriktestiktiń bolmaǵanyn málimdegen edi.
Kásipkerdiń mundaı tujyrymǵa Google kompanııasynyń AQSh Qarýly kúshterimen kelisimshartyn sozbaý týraly sheshiminen keıin kelgenin aıtady. Google Pentagonǵa áskerı drondardyń sýret arqyly baqylaý júıesin jasap jatqan bolatyn. Google Cloud basshysy Dıana Grın kelisimshartty toqtatýǵa qyzmetkerlerdiń qarsylyǵy sebep bolǵanyn aıtty.
Tarqata aıtar bolsaq, Google-dyń AQSh qorǵanys kúshterimen áriptestik qurýy kompanııa ishinde túsinispeýshilikke alyp kelgen. Project Maven dep atalatyn jobaǵa qarsy myńdaǵan jumysshy qol jınap, on shaqty qyzmetker óz erkimen jumystan ketken. Degenmen Google bul jobanyń negizinde AQSh-tyń Qorǵanys mınıstrligin baǵdarlamamen qamtamasyz etý ǵana jatqanyn aıtyp, aqtalady. Biraq Gizmodo portaly zerdelegen kompanııanyń ishki hattarynda basshylyq ásker men jasandy ıntellekt agenttikterimen qatynas túzeýge Maven jobasy úlken múmkindik beretinin jazǵan. Portaldyń habarlaýynsha, hattardan qalalardy baqylaýda ustaıtyn kúrdeli júıesi bar mashınany damytý jumystary júrip jatqanyn túsinýge bolady. Bul eki hat Google basshylyǵynyń Project Maven jobasyn qoldaǵanyn kórsetedi. Google jobany iske asyrý barysynda qıyndyqqa da kezikken. Olar áskerı drondar túsirgen sýretterdi jınaqtaýy kerek bolatyn, degenmen kompanııanyń memleketten osynshalyq qupııa aqparattardy óz bazalarynda saqtaýǵa ruqsaty bolmaǵan.
New York Times gazeti «Dıana Grın AQSh úkimetimen seriktestik úshin 9 mıllıon AQSh dollary tólenetinin habarlady, degenmen hattarda kelisimshart boıynsha eń kemi 15 mıllıon AQSh dollaryna kelisim bolǵany jáne jobanyń jalpy bıýdjeti 250 mıllıon AQSh dollaryna deıin ulǵaıtylatyny týraly aqparat bar» dep jazady. Joba daıyn bolsa, kompanııa Pentagondy qalany basqara alatyn, ár ǵımaratta kimder turyp, qandaı mashına aıaldaǵanyna deıin kórsetýge múmkindik beretin júıemen qamtamasyz eter edi. Biraq 2018 jyldyń jeltoqsanyna deıin Google AQSh Qorǵanys kúshterine kólikterdi anyq kórsete alatyn jasandy ıntellekt daıyndap úlgergen bolatyn. Bul kúrdeli baǵdarlamaǵa DigitalGlobe sýret júıesi men CrowdFlower jasandy ıntellekt júıesi qoldanylǵanyn aıta ketken jón.
Qytaı úkimetine arnaıy daıyndalyp jatqan Dragonfly qupııa jobasy týraly habar byltyr tamyz aıynda aqparat kózderine shyǵa bastaǵan edi. Joqqa shyǵarylǵan aqparattyń bıyl beti qaıta ashyldy. Google kompanııasynyń úkimet jáne qoǵammen baılanys boıynsha vıse-prezıdenti Karan Bhatııa 16 shildede ótken AQSh Senatyna qarasty zań komıtetiniń otyrysynda Dragonfly jobasynyń jumysy toqtatylǵanyn jáne qaıta qarastyrylmaıtynyn habarlady. Negizgi jospar boıynsha tyıym salynǵan aqparattyń ornyna kompıýter bos better kórsetedi. Máselen, baǵdarlama arqasynda 1989 jyly Tıananmende ótken stýdentter sherýi týraly aqparat múlde ashylmaı, jasyryn qalar edi. Bul jobaǵa da Google kompanııasynyń qyzmetkerleri qarsy bolyp, jabylýyn talap etken.
Eske sala ketsek, Donald Tramp buǵan deıin de Google-di Facebook, Amazon kompanııalarymen birge AQSh-tyń Demokratııalyq partııasymen kelisip, ózine qarsy jumys istedi dep aıyptaǵan. Alaıda bul joly prezıdent pen keńesshisi kompanııany memleketke satqyndyq jasady dep kinálap otyr.