Kópshiliktiń kóńilinen shyqqan brend

Taraz qalasynyń turǵyny Shahıstanyń negizgi mamandyǵy qarjyger eken. Ekinshi alǵan joǵary bilimi – zańgerlik. Biraq oqý bitirisimen eńbek jolyn  qurylys salasynan bastaǵan, búginde osy saladan qol úzbeı, jumysyn jalǵastyryp keledi.

– Árıne, polıetılen qubyr shyǵarý, baılanys jelileriniń qurylysyn júrgizý áıel adamdar aralasa qoımaıtyn ju­mys. Sol sebepti, men birneshe jyl buryn jeńil ónerkásip salasynda baq synap kóre­ıin degen oıǵa kettim. Birneshe aı oılanyp, túrli jospar qu­ryp, aqyry birjola bekindim. Osylaısha, 2014 jyldan bas­tap «Altezza» brendiniń tarıhy bastaldy, – deıdi Shahısta Muhamedjanova.

Isker qyz bul salanyń qyr-syryn jetik bilmese de, batyl­dyq tanytyp, tigin bıznesin ashýǵa sheshim qabyldaǵan. On­da da jaı ǵana kishigirim seh emes, úlken óndiris ornyn ashý­ǵa bekindi. Ǵımaraty, tigin mashınalary, jumysshylary bar fabrıka bolsa dep armandap qana qoımaı, armanyn júzege asyrýǵa kiristi. Túrkııadan qa­jet­ti mata túrleri men fýrnıtýralardy jetkizdi. Djıns materıaldan túrli kıim shyǵarýdy josparlady.

– Alǵashqy kezde buryn bilmegen birqatar problemamen betpe-bet keldim. Birinshiden, bizdiń óńirde maǵan qajetti mamandar tapshy eken. Kıim úlgisin pishetin tehnolog tappaı qınaldym. Ekinshi problema naryqty múldem bilmeýimnen boldy. Tutynýshynyń surany­syn, ne qalaıtynyn esh bilmes­ten, naryqty aldyn ala zerttep almaı turyp, birden ashyldyq. Sonyń saldarynan alǵashqy kezde bızneske salǵan biraz aqsham kúıip ketti. Aqyry tájirıbe jınaqtaı kele, áıel­­der kıimin tigetin bolyp shesh­tim, – deıdi kásipker qyz.

Dızaınerdiń aıtýynsha, eń úlken qıyndyq – otandyq shıkizattyń joqtyǵy. Qajet shıki­zattyń bári, mata, jip sııaq­ty kerek-jaraq ataýly Qytaı­­dan, О́zbekstannan, Túr­kııa­dan nemese Qyrǵyz­stannan jetkiziledi eken.

Jaqynda «Atameken» ult­­tyq kásipkerler palatasy jas kásipkerler arasynda «ALTYN OIMAQ» ulttyq baı­qaýyn jarııalaǵan bolatyn. Osy baı­qaýǵa qatysyp jatqan Shahısta:

– Men úshin baıqaýdyń bıznes-ıdeıasy qyzyqty boldy. Sol úshin qatysyp jatyrmyn. О́zim bul salaǵa dızaıner esebinde emes, óndirisshi retinde keldim ǵoı. Baıqaýdaǵy osy ıdeıa – kıim dızaıneri emes, qarapaıym kópshilikke, ıaǵnı, orta tapqa arnalǵan kıim shyǵaratyn kásipker retinde tartqany unady. Osy jolda kásibimdi damytsam deımin, – deıdi Shahısta.

Jas kásipkerdiń basty qa­ǵı­dasy – ómirdi barynsha jaýapkershilikpen súrý.

– Ár adam óz ómirine ózi ja­ýap­ty. Ne ekseń, sony ora­s­yń. Aldyma qoıǵan maq­satym kóp. Sonyń biri – ónim­di res­pýb­lıkanyń barlyq aıma­q­taryna taratý, – deıdi ol.

Taıaýda «Atameken» palata­sy­nyń Isker áıelder keńesi múshel­igindegi kásipker qyz-kelin­shekter arasynda uıym­dastyrylǵan «Jyl jańalyǵy» qosymsha baıqaýynyń je­ńim­pazdary jarııa etilgen bolatyn. Bul baıqaýda jeńim­pazdar­dyń qatarynda Shahıs­ta Muhamedjanova da marapattaldy.