Jańadan salynatyn qurylys nysandarynyń jobalyq quny 2 mlrd teńgeden asqan jaǵdaıda qazynashylyq súıemeldeý qoldanylady. Qarjy mınıstrligi qolǵa alǵan bul bastama kóleńkeli ekonomıkanyń aldyn alýǵa, bıýdjet qarajatyn ońtaıly paıdalanýǵa baǵyttalǵan.
Joba sharty boıynsha barlyq operasııalar qazynashylyqtyń aýmaqtyq bólimshelerinde ashylǵan jeke shot arqyly júzege asady. Bas merdiger men birinshi jelidegi qosalqy merdiger ǵana shot asha alady. Shottaǵy aqsha joba aıaqtalǵanǵa deıin saqtalady. Qurylys nysany paıdalanýǵa berilgennen keıin qarajatty ekinshi deńgeıli banktegi shotyna aýdarýǵa bolady. Bıýdjet qarajaty esebinen qarjylandyrylatyn qurylys jobalaryn iske asyrý kezinde barlyq aqshalaı tólemderdi baqylaýǵa múmkindik beretin bul joba ótken jyly Atyraý oblysynda da engizildi. Oblystyq qazynashylyq departamenti basshysynyń orynbasary Indıra Nýhınanyń aıtýynsha, Isataı, Jylyoı aýdandaryndaǵy turǵyn úıler, Atyraý qalasyndaǵy Bereke, Balaýsa, Samal shaǵyn aýdandaryndaǵy mektepter men Jańatalap aýylyndaǵy mektep-ınternat, Bereke shaǵyn aýdanyndaǵy qosalqy stansa qurylystary osy joba aıasynda jumys istep jatyr.
Jańa jobanyń tıimdiligimen qatar kemshin tustary da kúndelikti jumys barysynda belgili bolyp otyr. Kásipkerler aldyn ala tólem jasaý, elektrondy shot-faktýralar negizinde tólem aýdarý kezinde qıyndyqtar týyndaǵanyn aıtyp shaǵymdanǵan. «Qazynashylyq organdarynda osy máselege jaýapty arnaıy qyzmetker taǵaıyndaldy, – deıdi Indıra Nýhına. – Ol joba bastalǵannan aıaqtalǵanǵa deıin súıemeldep, máselege quzyreti sheginde túsinikteme beredi».
Elbasy «Qazaqstannyń úshinshi jańǵyrýy: jahandyq básekege qabilettilik» atty Joldaýynda bıýdjet shyǵystarynyń tıimdiligin arttyrýǵa basa mán bergen bolatyn. Qurylys salasyndaǵy memlekettik satyp alýlarǵa engizilgen bul ózgeristiń de basty maqsaty – osy. Tek halyqaralyq tájirıbedegi úrdisti ózimizge beıimdeý kezinde áli de jetildiretin tustar baryn nazarǵa alýymyz kerek.
Atyraý