Qazaq kúresinen álem chempıony, «Qazaqstan Barysy» týrnıriniń úsh dúrkin jeńimpazy Beıbit Ystybaev Taraz qalasynan 200 oryndyq bóbekjaı ashty. Jýyrda ǵana tarazdyq turǵyndar jaqsy iske kýá bolyp, bóbekjaıdyń ashylý saltanatyn tamashalady. Balýan salyp bergen bóbekjaı eki qabatty eńseli ǵımaratta ornalasqan. Elbasynyń «Týǵan jerge týyńdy tik!» aksııasy aıasynda bastaý alǵan ıgi bastama balalardyń bolashaǵy úshin qolǵa alynyp otyr.
Atalǵan balabaqshanyń meńgerýshisi, Qazaqstan Respýblıkasy Bilim berý isiniń úzdigi Aısha Nııazbekovanyń aıtýynsha, munda 1 jastaǵy bóbekter tobynan bastap, 6 jastaǵy mektepaldy daıarlyq tobyna deıingi balalar qabyldanady eken. Al búgingi tańda bóbekjaıda 4 top boıynsha 50-ge jýyq bala qabyldanyp, jumys bastalyp ketipti. Sonymen qatar bóbekjaıda keleshekte 8 top jasaqtalyp, 35 adam jumyspen qamtylady dep josparlansa, qazirgi kezde munda 15 adam eńbek etýde. Balabaqshadaǵy árbir topqa «Erketaı», «Juldyz», «Aıgólek» degen qazaqy ataýlar berilgen.
Bóbekjaıdyń ashana, májilis zaly, úıirme zaldary bar. Bári de zaman talabyna saı salynǵan. Sonymen qatar ydys-aıaq, tósek-oryn sııaqty qajettiliktiń de bári qamtylǵan. Balalar bes mezgil ystyq tamaqpen qamtamasyz etiledi. Endi barlyq talapqa saı ashylǵan bóbekjaıda aldaǵy ýaqytta aǵylshyn tili, horeografııa, kúres, taekvondo jáne gımnastıka úıirmelerin ashý josparda bar eken. Balalarǵa ómirge beıimdeý sabaǵy da uıymdastyrylýda.
Jambyl oblysy