Bilim kúni oblys ortalyǵyndaǵy «Bereke» shaǵyn aýdanynda 600 oryndyq qazaq mektebi óz esigin aıqara ashyp, oqýshylar men ata-analardy úlken qýanyshqa bóledi.
Sońǵy 12 jylda Petropavlda birde-bir bilim úıi salynbaǵan eken. Bul altynshy qazaq mektebi sanalady. Qala ákimi Bolat Jumabekov jınalǵandardy alǵashqy qońyraý merekesimen quttyqtap, ustazdar qaýymyna shyǵarmashylyq tabys tiledi.
Qurylys jumystary men materıaldyq-tehnıkalyq jabdyqtalýyna 1,5 mlrd teńge jumsalǵan, úsh qabatty nysandy «SK-Zerdeý» kompanııasy saldy.
Mektep dırektory Sáýle Tursynova 34 kabınettiń 24-ne ınteraktıvti taqta men LED-ekran qoıylǵanyn, 130 oryndy ashana, akt, úlken, kishi sport zaldary, lıft jumys isteıtinin jetkizdi. 70 adam jumyspen qamtamasyz etilgen, olardyń 45-i – muǵalimder. Ár bala úshin arnaıy kıim orny qoıylǵan.
«Serpin» baǵdarlamasy arqyly M.Qozybaev atyndaǵy Soltústik Qazaqstan memlekettik ýnıversıtetinde qazaq tili men ádebıeti pánderiniń muǵalimi mamandyǵyn alyp shyqqan Ádilbek Amantaı mektepke jumysqa qabyldanypty. Jambyl aýdanynda jabylyp qalǵan Ortalyq mektebinen kelgen Samat esimdi dene tárbıesi pániniń muǵalimi jáne bıyl joǵary oqý ornyn bitirip kelgen 6 jas maman da eńbek jolyn osynda jalǵastyrmaq.
«Jas О́rken» shaǵyn aýdanynda salynyp jatqan 900 oqýshyǵa laıyqtalǵan qazaq mektebi bıyl paıdalanýǵa beriletin bolsa, taǵy bir bilim úıine jer telimderi bólinip, qujattary rásimdelýde. Sonda Petropavl qalasynda barlyǵy 8 ulttyq mektep bolady. Bul jaǵynan teriskeı óńir ozyp tur.
Soltústik Qazaqstan oblysy