28 aqpanda bastalǵan Taıaý Shyǵystaǵy áskerı qaqtyǵys aımaǵynan 4700-den astam qazaqstandyq elge qaıtaryldy. Bul týraly Syrtqy ister mınıstrligi málimdedi, dep habarlaıdy Egemen.kz.
Azamattardy evakýasııalaý rezıdent jáne rezıdent emes áýe kompanııalarynyń reısteri arqyly, sondaı-aq jerústi joldarymen júzege asyrylyp jatyr.
6 naýryzda Qazaqstannyń sheteldegi dıplomatııalyq ókildikteri Irandaǵy Zarkuh kompanııasynda jumys isteıtin jeti qazaqstandyqty Iran-Armenııa shekarasyna jetkizýdi uıymdastyrdy.
Aldyn ala málimet boıynsha, kompanııa taǵy 16 qazaqstandyqty dál osy baǵytpen evakýasııalaýdy josparlap otyr.
Qazirgi ýaqytqa deıin Irannan 66 Qazaqstan azamaty elge oralǵan.
Zarkuh kompanııasy metall jáne beımetall paıdaly qazbalardy barlaý jáne óndirý salasynda ǵylymı zertteýler júrgizedi. Olardyń qatarynda altyn, mys, qorǵasyn, myrysh, sırek jáne baǵaly metaldar, sondaı-aq qurylys tasy, otqa tózimdi materıaldar jáne sement óndirisine arnalǵan shıkizat bar. Kompanııa Irandaǵy sement shıkizatyn barlaý jáne óndirý salasyndaǵy jetekshi uıymdardyń biri sanalady.
Aıta keteıik, Qazaqstannyń óńirdegi dıplomatııalyq ókildikteri jaǵdaıdy úılestirýdi jalǵastyryp, otandastarmen turaqty baılanysta.
Syrtqy ister mınıstrligi quzyrly organdarmen birlesip qaqtyǵys aımaǵynan qazaqstandyqtardy qaıtarý jumystaryn jalǵastyryp jatyr.
Taıaý Shyǵys elderinen 2 463 otandasymyz evakýasııalandy