TMD elderi arasynda ázirge balamasy joq «Rıng koroli» sporttyq týrnıri Petropavlda osymen úshinshi ret ótkizilip, halyqaralyq sıpat alýymen erekshelendi.
Oblystyq ákimdiktiń qoldaýyna súıengen Dene shynyqtyrý jáne sport basqarmasy elimizdiń óńirlerinen jáne Reseıden jınalǵan boks ardagerleri arasynda tórt kúndik irikteý jarysyn uıymdastyryp, kil myqtylar aqtyq saıysqa joldama aldy. Kúrzi judyryq ıeleri arasynda 3 halyqaralyq dárejedegi sport sheberiniń, 13 sport sheberiniń, Azııa oıyndarynyń chempıondary men júldegerleriniń bolýy boks dese, ishken asyn jerge qoıatyn jankúıerlerdiń zor qyzyǵýshylyǵyn týdyrdy.
Tartysty básekeni aımaq basshysy Qumar Aqsaqalov, bokstan Eýropa jeńimpazy, Álem kýbogynyń kúmis júldegeri Serik Nurqazov tamashalady.
Sharshy alańǵa birinshi bolyp Nur-Sultan qalasynyń 36 jastaǵy ókili, jazǵy Olımpıadaǵa qatysýshy Mırjan Rahymjanov pen 63 jastaǵy atyraýlyq Adık Bermeshov kóterildi. 64 kılo salmaq boıynsha kúsh synasqan ekeýi de jaqsy daıyndyqpen kelgenderin baıqatty. Birinshi raýndtan keıin M.Rahymjanov ózinen 27 jas úlken aǵasyna inilik izetpen jol berdi. Onyń bul qadamyna jınalǵandar úlken qoshemet kórsetti.
Petropavldyq Murat Qurmanǵojınov (69 kg) byltyrǵy týrnırdiń jeńimpazy Rýstam Jaqypovty birden aýyr soqqynyń astyna alyp, jerge sulatyp saldy. Qalǵan salmaqtar boıynsha astanalyq Aleksandr Lýchshev (75 kg), qaraǵandylyqtar Qýanysh Isembaev (81 kg), Tımýr Baıserkeev (91 kg-ǵa deıin) jeńis tuǵyrynyń eń bıik satysyna kóterildi.
Al 91 kılodan joǵary asa aýyr salmaqta qos reseılik Sergeı Tannagashev pen Saıran Smaıylov qolǵap túıistirdi. Áskerıler arasynda álem chempıony S.Smaıylov jerlesiniń boıshańdyǵyna, qoldarynyń uzyndyǵyna qaramastan, ábjil qımyl tanytyp, aılasyn asyrdy. Sóıtip, ótken jyly alań ıesi Andreı Beısenbaevtan utylyp qalǵan esesin qaıtardy. Oǵan «Rıng koroli-2019» beldigin Qumar Irgebaıuly saltanatty túrde tartý etti.
Jeńimpazdar men júldegerlerge aqshalaı syılyqtar da tapsyryldy.
Soltústik Qazaqstan oblysy