Prezıdent Qasym-Jomart Toqaev Úkimetke áleýmettik medısınalyq saqtandyrýdy júzege asyrý máselesine jaýapkershilikpen qaraýdy tapsyrdy. Keshe Premer-Mınıstrdiń orynbasary Berdibek Saparbaevtyń tóraǵalyǵymen medısınalyq saqtandyrýdy engizý máseleleri boıynsha keńes ótti.
Densaýlyq saqtaý mınıstri Eljan Birtanov Densaýlyq saqtaý júıesin medısınalyq qyzmetti medısınalyq saqtandyrý boıynsha kórsetýge daıyndaý týraly baıandady. Qazir daıyndyq jumystary bes negizgi baǵyt boıynsha júrgizilýde: quqyqtyq bazany qalyptastyrý, Densaýlyq saqtaý mınıstrliginiń aqparattyq júıelerin jaqsartý, qorǵa aýdarylǵan aqshaǵa monıtorıng júrgizý jáne saqtandyrylǵan adamdardy esepteý, aqparattyq-túsindirý jumystary, Qaraǵandy oblysynda medısınalyq saqtandyrýdyń qanatqaqty jobasyn engizý.
1 qyrkúıekten bastap engizilgen medısınalyq saqtandyrýdy testileý aldyn ala máselelerdi anyqtaýǵa jáneMÁMS-ke tolyq kóshý kezinde táýekelderdi joıýǵa kómektesedi. E.Birtanov ózge de memlekettik organdarmen birlesip sheshýdi talap etetin birneshe máseleni atady. «Medısınalyq saqtandyrý tabysty jumys isteý úshin halyqty barynsha kóbirek tartý kerek. Medısınalyq saqtandyrý qory saqtandyrylǵan adamdardyń sanyn turaqty túrde eseptep, monıtorıng júrgizedi. Búgingi tańda bizdiń baǵalaýymyz boıynsha, azamattardyń 94,6%-y MÁMS júıesimen qamtylǵan, al halyqtyń shamamen 5,4%-y nemese 1 mln adam saqtandyrylmaǵan», dedi Densaýlyq saqtaý mınıstri.
О́zin-ózi jumyspen qamtyǵan halyqty ózektendirý máselesi boıynsha vedomstvo basshysy 2,7 mln adamnyń 687,7 myńynyń mártebesi anyqtalmaǵanyn atap ótti. Sonymen qatar mınıstr eńbek jáne salyq zańdarynyń oryndalýyna baqylaýdy kúsheıtý qajet ekenin eske saldy. Selektorlyq rejimdegi keńeske óńirlerdegi ákimdikterdiń, densaýlyq saqtaý basqarmalarynyń ókilderi qatysty, olar medısınalyq saqtandyrýdy engizýge tehnıkalyq daıyndyq, 2020 jyldyń qańtarynan bastap medısınalyq kómek kórsetýdegi ózgerister jaıly halyqty habardar etý týraly baıandady.
«Medısınalyq saqtandyrý árbir turǵynǵa áser etedi, sondyqtan memlekettik organdar saqtandyrý medısınasyna birqalypty kóshý úshin barlyq qajetti sharalardy qabyldaýy tıis. Olar úılesimdi jáne ózara júıeli jumys isteýi tıis. Eń basty másele – balalardan bastap eresekterdiń barlyǵyn esepke alý qajet. Osy aıda halyq mártebesin ózektendirý, MÁMS júıesine jeńildik jasalǵan sanattar boıynsha qatysýshylardy retteý jumystaryn aıaqtaý kerek», dedi B.Saparbaev.
Sonymen qatar ákimdikterge 1 qazanǵa deıin medısınalyq uıymdardy kompıýtermen jabdyqtaý jáne ınternetpen qamtý jumystaryn aıaqtaýdy tapsyrdy, dep habarlady Premer-Mınıstrdiń baspasóz qyzmeti.