Jambyl atyndaǵy Qazaq memlekettik fılarmonııasy bıylǵy jańa maýsymynyń shymyldyǵyn aýqymdy halyqaralyq sharamen ashqaly otyr. 10-15 qyrkúıek aralyǵynda Jambyl atyndaǵy Qazaq memlekettik fılarmonııasy Qazaqstan Respýblıkasy Mádenıet jáne sport mınıstrliginiń qoldaýymen, «Classics Management Budapest» halyqaralyq agenttigimen yntymaqtastyqta I Almaty halyqaralyq operalyq-sımfonııalyq dırıjerleriniń baıqaýyn ótkizedi. Eldiń mádenı ómirindegi eleýli shara álemdegi eń úzdik dırıjerlerdiń basyn qosyp, jas daryndardyń bir-biriniń ónerimen jaqynyraq tanysýyna zor múmkindik syılap otyr.
Baıqaýǵa qatysý úshin 32 elden 140 ótinim berildi. Halyqaralyq baıqaý eki kezeńnen turady: irikteý týry bıylǵy jyldyń naýryz aıynda Býdapeshte bastalyp, 30 shildede aıaqtaldy. Bul kezeń qatysýshylardyń óneri men kásibı túıindemesin negizge aldy. Al Almatyda bastalǵan halyqaralyq baıqaýda sol irikteýden ótken Qazaqstan, Fınlıandııa, Avstrııa, Reseı, Soltústik Koreıa, AQSh, Japonııa, Portýgalııa, Qytaı, Italııa, Ispanııa, О́zbekstan, Fransııa, Sıngapýr elderiniń dırıjerleri baq synaıdy. Aptaǵa jýyq ýaqyt synǵa túsetin úmitker mýzykanttardyń ónerin Italııadan kelgen Vıttorıo Parızı, Djýzeppe Akvavıva, vengrııalyq Dıord Rat, Bolgarııadan shaqyrylǵan Dıan Chobanov, qazaqstandyq Serık Syrlybaev sekildi álemdik tanymaldylyqqa ıe sańlaq dırıjerler sarapqa salady. Eýropanyń búgingi tańdaǵy eń belgili dırıjerlerin quramyna toptastyrǵan baıqaý qazylarynyń tóraǵasy – Qazaqstannyń eńbek sińirgen qaıratkeri, Memlekettik syılyqtyń laýreaty Alan Bóribaev.
Sımfonııalyq orkestrdiń súıemeldeýimen óner jarystyratyn dırıjerler syny tórt kezeńnen turady. Baıqaýdyń birinshi týryna 56 qatysýshy jiberildi. Ekinshi týrǵa 16 qatysýshy jiberiledi. Al baıqaýdyń jartylaı máresine 8 qatysýshy jiberilse, aqtyq máre synynda 4 qatysýshy ǵana top jarýy kerek. Baıqaý jeńimpazdary 15 qyrkúıektegi gala-konsertte óner kórsetedi.
ALMATY