Elbasy, Nur Otan partııasynyń Lıderi Nursultan Nazarbaev Saıası keńestiń keńeıtilgen otyrysynda «Nur Media» holdınginiń aqparattyq strategııasyn túbegeıli qaıta qaraýdy, onyń ishinde jańa medıaǵa basa nazar aýdarýdy tapsyrdy. Partııalyq BAQ qarapaıym halyqtyń muń-muqtajyna qulaq asyp, ony sheshý úshin ózekti máselelerdi memlekettik organdarǵa jetkizetin obektıvti jáne jedel aqparat kózi bolýy kerek.
Búginde «Astana» elimizdegi jetekshi telearnalardyń bestigine endi. Sońǵy birneshe jylda telearnanyń kórermenderi tórt esege artyp, ózin-ózi tolyq qamtamasyz etip otyr. Partııa Tóraǵasynyń birinshi orynbasary Baýyrjan Baıbek osyǵan deıin atqarylǵan jumystar úshin Bıbigúl Jeksenbaıǵa alǵys bildirip, jaqynda efırge jol tartqan «Saıası rıng» jáne «Aitarym bar» tok-shoýlary men basqa da arnaıy jobalardyń mańyzdylyǵy týraly aıtty.
Telearnanyń jańadan taǵaıyndalǵan bas dırektory Qurmanbek Jumaǵalı Abaı atyndaǵy Qazaq ulttyq pedagogıkalyq ýnıversıtetin «jýrnalıstıka» mamandyǵy boıynsha támamdaǵan. Ár jyldary «Habar» telearnasynda prodıýser jáne júrgizýshi, «Qazaqstan» RTRK» AQ Aqparattyq-saraptamalyq baǵdarlamalar dıreksııasynyń dırektory, «Qazaq radıosy»-nyń basshysy, «Almaty» telearnasy bas dırektorynyń birinshi orynbasary, Qaraǵandy oblysy ákimi baspasóz qyzmetiniń jáne Mańǵystaý oblystyq Ishki saıasat basqarmasynyń basshysy qyzmetterin atqardy. Osy taǵaıyndaýǵa deıin ol «Qazaqstan RTRK» AQ Basqarma tóraǵasynyń birinshi orynbasary qyzmetin atqardy.