Bul týraly 18 qazan kúni ótken brıfıngte nan ónimderin óndirýmen jáne satýmen aınalysatyn kásipkerler málimdedi, dep habarlady Atyraý óńirlik kommýnıkasııalar qyzmeti.
Kásipker "Azmýhanov" JK dırektory Talǵat Qoshanov bul áreketti májbúrli shara dep sanaıdy.
-Biz astyqty aımaq emespiz. Biz, tipti, un da shyǵarmaımyz. Barlyq un syrttan ákelinedi. Qazir shyǵarylatyn nannyń ózindik quny 85,3 teńgege teń kelip otyr. Sondyqtan nannyń baǵasyn kóterýge májbúrmiz. Biz saýda núktelerine 90 teńgeden jiberemiz, olar 95 teńgeden satady, - dedi, T.Qoshanov. – Biz astyqty aımaq bolmasaq ta, bizdegi nan baǵasy el boıynsha eń tómen. Basqa oblystarda, máselen, nan baǵasyn 100 teńgege deıin, keıbir óńirler, tipti, 110 teńgege deıin kóterip jiberdi.
Onyń sózinshe, búginge deıin Atyraýda áleýmettik nan baǵasy eń tómen boldy. Kóptegen naýbaıhanalar shyǵynmen jumys istedi. Áleýmettik nan baǵasynyń ósýi barlyq aımaqtarda oryn alyp otyr. Áleýmettik nan daıyndalatyn joǵary surypty unnyń baǵasy 140 teńgeden asady. Bul – astyq baǵasynyń qymbattaýynan týyndap otyr. Mundaı úrdis ótken jyly da, aǵymdaǵy jyldyń basynda da baıqalǵan bolatyn.
Naýbaıhana ókilderi nan baǵasy keler aptanyń basynda joǵarylaıtynyn málimdedi. Alaıda, nan ónimderin óndiretin jáne satatyn kompanııalardyń barlyǵy birdeı nan baǵasyn birden ósirýdi kózdep otyrǵan joq. Mysaly, "Dáýlet Nan" JShS-i nan baǵamyn 75 teńge kóleminde osy aıdyń aıaǵyna deıin ustap turýdy ýáde etti. Marketıng bóliminiń basshysy Irına Kolesnıkova málimdegendeı, kompanııada ázirge burynǵy baǵamen alynǵan un qory bar.
-Aıdyń aıaǵyna deıin baǵa baıaǵysha bolady. Odan keıin baǵany ósiremiz. Biraq, shyny kerek, dál qazir naqty qansha paıyzǵa joǵarylatatynymyz týraly sheshim qabyldanbady, -dedi,I.Kolesnıkova.
Qalalyq ákimdiktiń kásipkerlik jáne aýylsharýashylyǵy bólimi basshysy Rýslan Dáýletovtyń sózine súıener bolsaq, qazirgi tańda áleýmettik mańyzy bar azyq-túlik ónimderiniń baǵasyn turaqtandyrý mehanızmin júzege asyrý tártibin bekitý týraly Atyraý oblysy ákimdiginiń qaýlysy daıyndalyp jatyr.
-Atalǵan tártip negizinde "Atyraý" ÁKK arqyly óz naýbaıhanalary bar kásipkerlik sýbektilerine, saýda jelilerine jeńildetilgen qaryz beriledi. Olar óz kezeginde, belgili bir taýarlar men olardyń baǵasy boıynsha, ózderine mindettemeler alady. Máselen, un, nan ónimderine. Sáıkesinshe, halyqta tańdaý bolady. Atalǵan saýda jelilerinde nan baǵasy tómen bolady, - dedi R.Dáýletov. – Ákimdik qaýlysy ádilet organdarymen kelisý satysynda. Qaýlyǵa qol qoıylǵannan keıin zańdy kúshine enedi. Búgingi tańda oblys aýmaǵynda otyzdan astam naýbaıhana bar, olar táýligine 50 myńǵa deıin nan ónimderin shyǵarady.