Mańǵystaý týrızm kolledjinde óńirlik koreı etnomádenı ortalyǵy "Chhýsok" dástúrli merekesin atap ótti.
Atalmysh is-sharaǵa kolledj muǵalimderi men stýdentteri, koreı etnomádenı ortalyǵynyń ókilderi, «Jańǵyrý joly» respýblıkalyq jastar qozǵalysynyń óńirlik shtaby qatysty.
«Choson» koreı etnomádenı birlestiginiń tóraıymy Madenova Raısa kelgen qonaqtardy koreı halqynyń mádenıetimen, salt-dástúrimen, ónerimen tanystyryp ótti.
«Chhýsok» – qyrkúıek pen qazan aıynyń ortasynda toılanatyn koreı halqynyń eń ataýly merekesi. Koreıada bul mereke 5 kún qatarynan toılanady. Mereke ataýynyń maǵynasyna zer salsaq «chhý» koreı tilinen aýdarǵanda - kúzdi, «sok» - keshti bildiredi eken, ıaǵnı «kúzgi kesh» dep aýdarylady. Mereke ejelden kúzgi jıyn-terim jumystarynyń aıaqtalýyna sáıkes tusta, aı tolǵan kezde toılanady. Ataýly mereke arnaıy jemis-jıdekterdiń, dándi daqyldardyń pisip jetilgen kezine oraılastyrylyp ótkiziletin yrys-berekeni, eńbekti nasıhattaıtyń dýmandy mereke.
Is-shara barysynda jaqynda ótken koreı kınofestıvaliniń joǵary deńgeıde ótýine úles qosqan birneshe jastar Alǵys hattarmen marapattaldy. Sonymen qatar «NURBANK» AQ Aqtaý qalasyndaǵy fılıaly koreı ókilderiniń aǵa býyndaryn ataýly merekemen quttyqtap, syılyqtar tabystady.
«Chhýsok» meıramynda koreı halqynyń ulttyq taǵamdary jáne ulttyq kıimderinen kórme jasaqtaldy. Is-shara sońynda án shyrqalyp, mereke kóńildi aıaqtaldy.