Kógershinjúrek
Ol kúni de jaıdary jazdyń jazıra tańy jadyraı atqan. Záýlim sýpermarkettiń aldynda, adamdar nópiriniń arasynda ótken-ketkenge alaqan jaıyp tilenshi qyz júr. Biraq sýdaı aǵylǵan qalalyqtardyń oǵan burylýǵa murshasy joq. Tek qoldorbasyna talǵajaý eter aırany men ol-pulyn salyp alǵan qalaqtaı qarııa ǵana kilt toqtaı qalyp, nanynyń shetin syndyryp qyzǵa usyndy. Bala aq toqashtan qarpyp bir asady da qalǵanyn jentektep-jentektep jan-jaǵyna shashyp jiberdi. Sol-aq eken – qaıdan qaptap ketkenin baıqap ta úlgirmedim – qyzdyń aınalasy men ústi-basy túgel kógershinge tolyp ketti! Ekeýi eki ıyǵyna qonyp alypty. Bireýi – tóbesinde, endi bireýi bileginde otyr. Tipti mańaıyndaǵy adamdardan jasqanar túrleri joq.
Kógershinge oranǵan kógershin qyz! Kútpegen kórinis!
Kóz aldyńyzǵa keltirip kórińizshi. Ǵajap sýret!
* * *
... Kógershin de peıili taza, meıirimdi adamdy tanıdy, sonyń ǵana qolyna qonady. Mynaý besikten beli shyqpaı jatyp tilenshilikke túsken jetkinshektiń júregi netken keń edi! Tipti mynandaı «qyzyqqa» qarap turýdyń ózi qıyn eken. Kóńilim órekpidi. Janym jylady. Balanyń saltaq-saltaq kónetoz kúrteshesiniń qaltasyna qolyma ilikken temir teńgelerdi saý etkizip sala saldym da jedeldete basyp alystaı berdim. Biraq sol kórinis kóńilde qalyp qoıdy...
Jumaǵazy IGISIN