Kelesi jyldan bastap Qaraǵandy oblysynda jergilikti qalalardaǵy turǵyn úılerdiń qasbetteri jóndele bastaıdy. Bul týraly apparat jınalysynda óńir basshysy Jeńis Qasymbek málimdedi.
Qazirgi tańda Senattyń qaraýyna jiberilgen «Turǵyn úı qatynastary týraly» Zańǵa engizilgen túzetýlerde páter ıeleri kooperatıvterin taratý, úılerdi qalypty jaǵdaıda ustap turý úshin jınaq shottaryn ashý, sondaı-aq qalalyq jáne oblystyq bıýdjet esebinen kópqabatty úılerdiń qasbetterin jóndeýdi qarjylandyrý qarastyrylǵany belgili. Osy jaıtty eskergen oblys basshysy kelesi jyldan bastap shaharlardyń problemalyq negizgi kóshelerinde jumysty bastap ketýdiń josparlanǵanyn aıtty.
– Bul bizge ǵımarat qasbetteri boıynsha belsendi jumys isteýge múmkindik beredi, jınaq shottaryn ashýdy jáne jóndeý jumystaryna bıýdjetten qarjy bólýdi qarastyrady. Buryn bul jumystardy atqarý úshin demeýshilerdi izdestirýshi edik, al qazir muny qala nemese oblys esebinen iske asyra alatyn boldyq, – degen Jeńis Qasymbek qala basshylaryna on kún ishinde úı qasbetterin birinshi kezekte jóndeýdi qajet etetin problemalyq kóshelerdiń tizimin berýdi tapsyrdy.
Shynynda da Qaraǵandydaǵy jáne oblystyń basqa da qalalaryndaǵy úılerdiń súıkimsiz surǵylt túsi adamnyń eńsesin basyp turýshy edi. Endi olar túrli-tústi, kóz qýantatyn tústerge boıalyp, syrlanatyn bolǵany bórikti aspanǵa atyp shattandyrmasa da, qýanarlyq jańalyq. Árıne budan qarapaıym turǵyndardyń tirligi ońalyp, jaǵdaıy jaqsaryp ketpesi belgili. Degenmen aınalańdaǵy, óziń turyp jatqan qalanyń kóshelerindegi kempirqosaqtyń túsindeı kóńilge qýanysh syılar boıaýlardyń bolǵany qandaı jaqsy!
Jalpy, ekonomıkasy damyǵan elderde turǵyzylǵanyna jarty ǵasyrdan asyp ketken turǵyn úıler typ-tıpyl bolyp syrylyp, olardyń ornyna jańasy salynatynyn biz jaqsy bilemiz. Bizdiń de osy kúnderge túbi jetetinimiz anyq. Ázirge jaýyrdy jaba toqyp, eńseni túsiretin eń bir surqaı tús – sur boıaýlardyń kózin joısaq, munyń ózi úlken jeńis bolar edi.
Statıstıkalyq derekterge súıensek, oblystaǵy 5815 kópqabatty turǵyn úıdiń qasbeti jóndeýdi qajet etetin kórinedi. Bulardyń basym kópshiligi el arasynda «Hrýshevka» atalyp ketken qarasur tústi úıler bolar dep batyl joramal jasaýǵa bolady. Sondaı-aq bul tizimge Stalın zamanynda salynyp, syrty satpaq-satpaq bolyp turǵan eski úıleriń kirýi de ábden múmkin...
Qasbeti árlenip-syrlanyp, ádemi keıipke engen úılerdiń tý syrtyn da, ıaǵnı aýla jaqqa qaraıtyn betin de jaǵdaı jaqsarǵan kezde kóńildi tústerge boıap qoıýdy umytpaý kerek. Sonda ǵana oblystaǵy qalalardy kelgen qonaqtarǵa uıalmaı kórsetýge bolady. Iаǵnı taıaqtyń eki ushy baryn umytpaǵan jón.
Qaraǵandy oblysy