30 qazan kúni Atyraýǵa «FIGHT NIGHTS GLOBAL» chempıony Jalǵas Jumaǵulov pen M-1 chempıony Sergeı Morozov keldi, dep habarlady Atyraý oblysynyń О́ńirlik kommýnıkasııalar qyzmeti.
Qos chempıon «Jaıyq» sport kesheninde munaıly astanadaǵy jankúıerlerimen kezdesti.
-Atyraýǵa kelgen saıyn bizdi joǵary deńgeıde kútip alady. Búgingi kezdesýdi uıymdastyryp jatqan barsha uıymdastyrýshylarǵa alǵysym sheksiz. О́zderińizdeı bizdi qoldaıtyn el barda, árqashan jeńiske jetetinimizge senimdimin, - deıdi Sergeı Morozov.
Sondaı-aq kezdesý barysynda chempıondar jankúıerlerdiń saýaldaryna jaýap berip, aldaǵy josparlarymen bólisti.
Meniń FIGHT NIGHTS-pen kelisim shartym aıaqtaldy. Endigi kezekte UFC-ǵa shyǵýǵa jumystanyp jatyrmyn. Kelesi jyly shyǵyp qalýym múmkin, - deıdi Jalǵas Jumaǵulov.
Sport sańlaqtaryna atyraýlyqtar qurmet kórsetip, at mingizdi.
Aıta keteıik, Jalǵas Jumaǵulov 19 qazan kúni Sochı qalasynda ótken aralas jekpe-jekten reseılik Álı Bagaýtınovpen kezdesip, jeńiske jetken bolatyn. Osylaısha, ózine tıesili Fight Nights Global chempıondyq tıtýlyn saqtap qaldy. Sonymen qatar 19 qazan kúni, Sergeı Morozov amerıkandyq Djosh Rettınghaýspen kezdesý ótkizdi. Tóreshilerdiń sheshimimen jeńiske jetken Sergeı M-1 Global tıtýlyn qorǵap shyqty.