Elbasy Nursultan Nazarbaev Túrkistan oblysyna jumys sapary aıasynda oblys ortalyǵyndaǵy mádenı-aǵartý nysandarynyń, ártúrli baqtar men arbattyń qurylys josparymen tanysty. Sonymen birge Elbasyna «Kúltóbe» qalashyǵy arheologııalyq parkin qurý jospary tanystyryldy.
Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev Shyǵys Qazaqstan oblysy Túrkistanǵa tartý etken áýendi sýburqaq ornalasqan jańa alańda qala jurtshylyǵymen kezdesip, oblys ortalyǵynyń aldaǵy ýaqytta kórkeıip, damı beretinin atap ótti. «Tereń tarıhqa úńiletin bolsaq, bul – qasıetti óńir, kıeli jer. Jıyrma bir hanymyz jerlengen, sultandarymyz ben áýlıeler máńgilik tynyshtyq tapqan óte kıeli oryn. Táýelsizdik alǵannan keıin, árıne men kóne shaharǵa erekshe nazar aýdardym. Tipti astanany tańdaǵan kezde de biraz oılandym. Biraq oǵan jaǵdaı bolmady, ózderińiz bilesizder.
Mine, endi ýaqyty keldi. Túrkistan qalasyn oblys ortalyǵy etip, qaıtadan jandandyryp, elimizge osy kıeli ordany qaıtarý múmkinshiligi týdy. Bul qala búkil Túrki dúnıesiniń ortalyǵy ekeni bárimizge belgili. Kórshi aǵaıyndar О́zbekstan, Qyrǵyzstan, Túrikmenstan qýanyp jatyr. Olar da atsalysyp, bizge kómektesedi dep senemin. Túrkistan shahary aldaǵy ýaqytta iri megapolıske aınalady. Osydan birshama jyl buryn Túrkistannyń 1500 jyldyǵyn atap ótemiz dep biraz sharýany atqarǵan edik. Sonda osy alańda kezdesip, sóıleskenbiz. Sol kezde Túrkistan ortalyq bolady dep aıtqanmyn.
Minekeı, byltyr men tarıhı Jarlyqqa qol qoıdym. Elimizde Almaty, Nur-Sultan jáne Shymkent – bir mıllıon turǵyny bar qalalar qatarynda. Bolashaqta osyndaı úlken qalalarda ekonomıka, mádenıet – barlyǵy ósip-órkendeı beredi. Biz de sol jolmen júremiz. Aldaǵy ýaqytta mıllıon turǵyny bar qalalar sany taǵy artady», dedi Nursultan Nazarbaev.
Sondaı-aq Elbasy búginde oblys ortalyǵynda qurylys qarqyn alǵanyn, onyń ishinde Qoja Ahmet Iаsaýıge, Qazaq tarıhyna, Túrki tarıhyna baılanysty nysandar salynyp jatqanyn atap ótti. Týrızmniń damı túsetinine senim bildirdi. «Túrkistanda birneshe kezeńde 175 ǵımarat salý josparlanǵan. Sonyń 102-si bıyl iske qosylady. Jumystyń qandaı qarqynmen atqarylyp jatqanyn kórip otyrsyzdar. Bul úshin men osy jerde barlyq oblystardyń basyn qostym. Qolynan is keletin azamattar óz sharýasyn dóńgeletip áketip jatyr. Bolashaqta ádemi qala bolady, halyq sany ósedi. Qazir qala turǵyndarynyń sany 170 myń bolsa, menińshe az ýaqyttyń ishinde jarty mıllıonǵa jetedi. Keıin odan saıyn kóbeıedi dep oılaımyn», dedi Elbasy.
Nursultan Nazarbaev Túrkistannyń aldaǵy ýaqytta tarıhı, mádenı ortalyqqa aınalatynyna senim bildirdi. «Túrkistan úlken qalaǵa aınalyp, jan-jaqtan týrıster keletin bolady. Bıyldyń ózinde bir mıllıonnan astam týrıst kelipti. Al, myna ǵımarattar salynǵannan keıin tarıhı, mádenı ortalyq qalyptasyp, týrıster kóptep keletin bolady. Demek, túrkistandyqtar jumyssyz qalmaıdy. Myna salynyp jatqan ǵımarattarda, qonaqúılerde qanshama túrkistandyq jumys isteıtin bolady, osy shahardan nápaqasyn taýyp, halyqtyń ál-aýqaty jaqsarady», dedi Nursultan Nazarbaev.
Elbasynyń Túrkistan oblysyna jumys sapary búgin jalǵasyn tabýda.
Túrkistan oblysy