Kenshiler astanasyndaǵy «Shalqyma» konserttik zalynda ótken Mádı Bapıuly atyndaǵy dástúrli IV respýblıkalyq baıqaýda elimizdiń barlyq oblystarynan, sondaı-aq, Nur-Sultan, Almaty jáne Qaraǵandy qalalarynan barlyǵy 34 jas ánshi baq synady.
Halyq ártisi Qaırat Baıbosynov bastaǵan qazylar alqasynyń sheshimimen qaraǵandylyq Azat Ábdiǵalym bas júlde ıegeri atandy. Mańdaıy jarqyrap top jarǵan daryndy ánshiniń oryndaýyndaǵy Mádı ánderi qazylar alqasynyń ǵana emes, degdar tyńdarmannyń da kóńilinen shyǵyp, ystyq yqylasyna bólendi.
Kókshetaýdyń áıdik ánshisi Shyńǵys Sársenbaıǵa birinshi júlde buıyrdy. El astanasynan kelgen kúmiskómeı ánshi qyz Alýa Qalambekova men almatylyq talant Aqjol О́serbaı ekinshi júldeni ózara bólisti. Al úshinshi júldege birinen biri ótetin úsh ánshi – Dáýrenbek Slıamǵalı men Birjan Aıtahmetov (Almaty) jáne Aıaýlym Qamajan (Nur-Sultan) laıyqty dep tanyldy.
Jeńimpaz ben júldegerlerge laıyqty syı-sııapat jasaldy.
Baıqaý sońynda gala-konsert ótip, onda dombyrashylar ansambli men Mádı Bapıuly atyndaǵy IV respýblıkalyq baıqaýdyń laýreattary óner kórsetti. Olar Mádı Bapıulynyń el ishine keń taraǵan «Qarakesek», «Úsh qara» jáne «Qarqaraly» ánderin shyrqap, tyńdarman qaýymnyń qulaq quryshyn qandyrdy.
Qaraǵandy oblysy