Premer-Mınıstr Asqar Mamınniń tóraǵalyǵymen ótken Úkimet otyrysynda elimizdiń 2019 jylǵy qańtar-qazan aılaryndaǵy áleýmettik-ekonomıkalyq damýynyń jáne respýblıkalyq bıýdjettiń oryndalýynyń qorytyndylary qaraldy. Bul týraly Úkimettiń baspasóz qyzmeti habarlady.
Ekonomıkanyń, bank salasynyń, respýblıkalyq bıýdjettiń oryndalýynyń, memlekettik satyp alýlardaǵy jergilikti qamtýdyń jaı-kúıi týraly Ulttyq ekonomıka mınıstri R. Dálenov, Ulttyq bank tóraǵasy E. Dosaev, Premer-Mınıstrdiń birinshi orynbasary – Qarjy mınıstri Á. Smaıylov baıandady, ónerkásip jáne kólik salasyndaǵy jaǵdaılar týraly, eksporttyq ónimder boıynsha Indýstrııa jáne ınfraqurylymdyq damý mınıstri B. Atamqulov, agrarlyq sala boıynsha Aýyl sharýashylyǵy mınıstri S. Omarov, munaı-gaz salasy týraly Energetıka birinshi vıse-mınıstri M. Dosmuhambetov málim etti.
Qazaqstan ekonomıkasy turaqty ósý betalysyn kórsetip otyr — 2019 jylǵy qazan-qańtar aılarynda JIО́ ósimi ótken jyldyń sáıkes kezeńine 4,4% qurady. Qurylysta – 12,7%, saýdada – 7,5%, kólik salasynda – 5,6%, óńdeý sektorynda, onyń ishinde mashına jasaýda – 18,2%, jeńil ónerkásipte – 19%, tústi metaldar óndirisinde – 7,5%, munaı óńdeýde – 7,2%, metall kenderin óndirýde – 16,1%, baılanys qyzmetinde – 4,5% oń dınamıka baıqalyp otyr. Ulttyq qor aktıvteri 2,1%-ǵa $59,2 mlrd-qa deıin, respýblıkalyq bıýdjetke kirister – 8386,6 mlrd teńgege (jospardyń 100%) artty, ósý qarqyny 113,7% qurady.
Premer-Mınıstr Batys Qazaqstan, Qyzylorda, Mańǵystaý oblystarynyń jáne Nur-Sultan qalasynyń ákimderiniń esebin tyńdady, bul óńirler birqatar ekonomıkalyq kórsetkish boıynsha artta qalyp otyr, sondaı-aq, bıýdjet qarajatyn barynsha ıgermegen mınıstrlikterdiń basshylary — Ekologııa, geologııa jáne tabıǵı resýrstar (10,6 mlrd tg), Bilim jáne ǵylym (9,3 mlrd tg), Mádenıet jáne sport (6,1 mlrd tg), Sıfrlyq damý, ınnovasııalar jáne aeroǵarysh ónerkásibi (5,1 mlrd tg) mınıstrleri tyńdaldy.
«Elbasy Nursultan Nazarbaev Nur Otan partııasy fraksııasynyń keńeıtilgen otyrysynda ekonomıka ósimin qamtamasyz etý mindetin alǵa qoıdy. Memleket basshysy Qasym-Jomart Toqaev ekonomıkalyq máseleler jónindegi keńeste elimizdiń makroekonomıkalyq, qarjylyq jáne áleýmettik turaqtylyǵyn saqtaý boıynsha sharalardy qabyldaýdy tapsyrdy», — dedi A. Mamın.
Premer-Mınıstr óńirler men mınıstrlikterdiń basshylaryna Elbasy N. Nazarbaev pen Prezıdent Q. Toqaev alǵa qoıǵan mindetterdi oryndaý jumystaryn jandandyrýdy, sondaı-aq, mańyzdy ónerkásiptik kórsetkishterdiń ósimin yntalandyrýdy tapsyrdy.
Úkimet basshysy Aqtóbe, Aqmola, Shyǵys Qazaqstan, Pavlodar jáne Soltústik Qazaqstan oblystary ákimdikteriniń jumysynyń jaqsy nátıjesin atap ótti, olarda osy jyldyń 10 aıynyń qorytyndysy boıynsha negizgi ekonomıkalyq ındıkatorlardyń ósimi baıqalady. Artta qalýshy ákimdikterge problemalyq kórsetkishter boıynsha jaǵdaıdy retke keltirý úshin túbegeıli sharalardy qabyldaýdyń qajettigi aıtyldy.
«Bıýdjet bóligi boıynsha ótken jylmen salystyrǵanda, osy jyl josparynyń asyra oryndalýy baıqalýda. Degenmen, bıýdjettik baǵdarlamalardyń birqatar ákimshisinde bıýdjet qarajattarynyń ıgerilmeýi belgilengen. О́tkizilmegen konkýrstar, josyqsyz merdigerler jáne qarjylandyrý josparlary boıynsha ózgerister jónindegi dálelder qabyldanbaıdy. Jyl sońyna deıin bir jarym aı qaldy», — dedi A. Mamın.
Premer-Mınıstr ekonomıkanyń sapaly ári turaqty ósimin qamtamasyz etý úshin ınvestısııalar tartýǵa, jumys oryndaryn qurýǵa, ónimdilikti arttyrýǵa jáne azamattardyń ál-aýqatyn jaqsartýǵa barlyq kúsh-jigerdi jumsaý qajet ekenin atap ótti.