Oblystyq tarıhı-ólketaný mýzeıinde kelýshilerge arnap dastarqan jaıyldy. Kelgender dastarqan basynan oryn aldy. Bul mýzeıge kelýshilerge halqymyzdyń ulttyq taǵamdaryn, onyń erekshelikterin tanystyrýdy maqsat etken «As – adamnyń arqaýy» atty etnografııalyq ınteraktıvti joba bolatyn.
Onda qazaqtyń ulttyq taǵamdarynyń qundylyǵy men qunary, onyń jasalý joldary týraly qyzyqty málimetter berildi. Ásirese sútten jasalatyn taǵamdarǵa kóbirek mán berildi. Sebebi kóshpendilik turmystyń ózinde analarymyz maldyń sútinen túrli taǵam daıyndaǵan. Búginge deıin olardyń eshqaısysynyń da taǵamdyq mańyzy joıylǵan joq. Kelýshilerge qymyz ben shubattan, balqaımaqtan, irimshikten, shelpekten dám aýyz tıgize otyryp, onyń quramy, densaýlyqqa paıdaly tustary áńgimege arqaý boldy.
О́kinishke qaraı, ulttyq taǵamdardyń keıbir túrleri dastarqannan jıi kórine bermeıdi, tipti umytylyp bara jatqandaı.
– Sońǵy jyldary dastarqannan balqaımaqty, irimshik túrlerin, kójeni sırek kóremiz. Mysaly, maıly, tym tátti jentti analarymyz qonaq, quda-jegjat kelgende jasaǵan. Al qurt kóje, sýsyn kóje, balqaımaq sekildi taǵamdar kúndelikti dastarqanda turǵan ǵoı. Qazir osyny kelinder men jeńgelerimiz jańǵyrtsa, qandaı jaqsy bolar edi. Olar ekologııalyq jaǵynan taza, adam aǵzasyna qajetti dárýmender men mıneral zattarǵa baı. Balalarǵa osy taǵamdardy pisirip bermegen analar kóp nárse joǵaltty dep oılaımyz, – dedi mýzeıdiń ǵylymı qyzmetkeri Aıgúl Nyǵmetjanova.
Sonymen qatar mýzeı kelýshilerine maı shaıqaý tásili kórsetildi. Halqymyz taǵam daıyndaýǵa qoldanǵan mýzeı qoryndaǵy ydys-jádigerler de shyǵaryldy. Onyń ishinde kúbi, pispek, qymyz quıatyn aıaqtar, aǵash tabaqtar bar. Kelýshiler arasyndaǵy jastar jaǵy sary maı salyp saqtaıtyn qaryndy tipti kórmegenderin aıtty. Aıgúl Nyǵmetjanova qarynnyń jasalý tehnologııasymen de tanystyrdy. Rasynda, qazir sary maıdy qarynǵa salyp saqtaıtyndar, áı, bar ma eken? Sıyr saýmaıtyn aýyl áıelderi qaryndy ne istesin?..
QOSTANAI