Soltústik Qazaqstan oblysynda sońǵy bir aıdyń ishinde túngi mezgilde jolǵa shyǵyp ketken jylqylardyń kesirinen úsh jol-kólik apaty boldy.
Sonyń ishinde Aıyrtaý aýdanynda aýyr júk kóliginiń júrgizýshisi joldan ótip bara jatqan 12 jylqyny soǵyp ketken. Mal ólip, júrgizýshiniń ózi jaraqat aldy. Jylqyshynyń aıtýynsha, jylqynyń bir bóligi tabynnan bólinip, joldyń júretin bóligine qalaı shyǵyp ketkenin baıqamaı qalǵan.
Al Esil aýdanynda jylqyny soqqan sheteldik kóliktiń júrgizýshisi men onyń jolaýshysy aýyr jaraqat aldy. Birneshe kúnnen keıin zardap shekken áıel alǵan jaraqattardyń saldarynan qaıtys boldy. О́tken dúısenbide Aqqaıyń aýdanynda da osyǵan uqsas oqıǵa bolyp, eki adam zardap shekti. Barlyq jol apattary túnde oryn alǵanyn atap ketken jón.
«Maldyń qatysy bar jol-kólik oqıǵalaryn aldyn alý maqsatynda is-sharalar ótkizý qajettigi týraly barlyq aýmaqtyq bólinisterge nusqaý berildi. Patrýldik polısııa qyzmetkerleri, ásirese qarańǵy tússe bul máselege erekshe nazar aýdarady. Respýblıkalyq mańyzy bar joldardyń ústinde nemese janynda bos jaıylyp júrgen mal anyqtalǵan jaǵdaıda jergilikti atqarýshy organdarǵa habarlap, maldy jol mańynan alysqa aıdaý sharalary qabyldanady», - dedi SQO PD Jergilikti polısııa qyzmeti basqarmasynyń bastyǵy polısııa podpolkovnıgi Aıdyn Baımatov.
Apatqa sebepshi bolǵan mal ıelerine Ákimshilik kodeks boıynsha jaýapkershilik kózdelgen. Sonymen birge jábirlenýshiler keltirilgen materıaldyq shyǵyndy óteý maqsatymen sotqa júginýge quqyly. Maldy joldan arnaıy «Maldy ótkizý» belgisi ornatylǵan jerden ǵana aıdap ótýge bolady. Sondaı-aq polıseıler júrgizýshilerge jyldamdyqty shekten tys asyrmaýǵa keńes beredi. «Maldy ótkizý» belgisi turǵan jaǵdaıda mindetti túrde jyldamdyqty azaıtý qajet. Sonymen birge qarańǵyda jabaıy ańdardyń da jolǵa shyǵa keletinin esten shyǵarmaǵan jón.
IID qyzmetkerleri mal ıeleriniń jergilikti atqarýshy organdarmen jáne malshylarmen úsh jaqty shart jasap, tórt túlikti uıymdastyrylǵan túrde baǵýdy qamtamasyz etý kerektigine nazar aýdarýyn talap etken.
Soltústik Qazaqstan oblysy