Elimizdiń qaı túkpirinde bolsyn, sol óńirdiń áleýmettik-ekonomıkalyq turǵydan alǵa qaraı damýyna septigin tıgize alatyn qarjylyq kúsh-qýaty mol kompanııalar men korporasııalar bar. Máselen, Batys Qazaqstan oblysynda mundaı kásiporyndar sapynda Alıans KPO b.v bar desek, Atyraýda «Shevron», al Aqtóbede «SNPS» korporasııasyn aıtýǵa bolady.
«SNPS-Aqtóbemunaıgaz» AQ – Aqtóbe oblysy aýmaǵyndaǵy eń iri kásiporynnyń biri. Onyń úlesine óńirde óndiriletin munaı men kómirsýtegi shıkizatynyń 70 jáne suıyq otyn men gazdyń 90 paıyzy tıesili. Korporasııa men qurylymdyq bólimshelerinde 6 200-den astam qyzmetker jumys isteıdi. Sońǵy bes jyl ishinde atalǵan aksıonerlik qoǵamnan 500 mıllıard teńge kóleminde ınvestısııa tartyldy. Áıtse de keıingi kezde atalǵan óndiristik ujym burynǵy júrdek júrisinen jańylyp qalǵandaı.
Strategııalyq mańyzy bar shıkizat ónimderin óndiretin iri kásiporynnyń máseleleri aýqymdy bolýy tabıǵı jaıt. Investısııa tartý aýqymy, eńbek ónimdiligi qarqyny da tómendep ketý kórinisteri baıqalyp otyr. Bul jaıt óz kezeginde moraldyq turǵydan eskire bastaǵan qural-jabdyqtardy tehnologııalyq turǵydan qaıta jańǵyrtý qajettiligin kórsetedi.
Sonymen birge «SNPS-Aqtóbemunaıgaz» eńbekti uıymdastyrý men jumysshylardyń eńbekterine laıyqty eńbekaqy tóleı almaı júr. Aıtalyq, Aqtóbe oblysy ákiminiń orynbasary Qaırat Bekenovtiń málimdeýine qaraǵanda, qazirgi kezde korporasııa qojaıyndarynyń óz jumysshylaryna tólep júrgen ortasha eńbekaqysynyń mólsheri tutastaı respýblıka boıynsha munaı salasy qyzmetkerleriniń ortasha jalaqysymen salystyrǵanda úsh-tórt esege az eken.
«SNPS» korporasııasy dırektorlar keńesiniń tóraǵasy Van Ilın Aqtóbe oblysynyń ákimi Ońdasyn Orazalınmen kezdesýi kezinde atalǵan jaǵdaıdy kásiporynda oryn alyp otyrǵan ýaqytsha kidirister men kedergilerge baılanysty ekenimen túsindirdi. Onyń aıtýynsha, jumysshylarǵa tolymdy eńbekaqy tóleý máselesi aldaǵy kezde tolyǵymen sheshimin tappaq.
Taǵy bir atap óterlik jaıt, buǵan deıin jasalǵan ózara kelisimderge sáıkes sheteldik kompanııa qyzmetke jergilikti mamandar men jumysshylardy udaıy tartyp otyrýǵa tıis. Áıtse de atalǵan kelisim talaptary men normalary oryndalmaı keledi. Esesine sońǵy jıyrma jyldyń ishinde kompanııa basshylary sheteldik jumysshylardy udaıy tartý úrdisin jalǵastyryp kelgen. Sondaı-aq osy aralyqta kásiporyn janynan qazaqstandyq mamandardy oqytý men jańa kásipke beıimdeý isinde formaldylyqqa ári birqatar ústirttikter men olqylyqtarǵa jol berilgen. Onyń sapalyq deńgeıi óte tómen bolǵan.
Bul arada basty áńgime ınjener-tehnık kadrlarǵa baılanysty emes, III jáne IV sanattaǵy qarapaıym jumysshylarǵa qatysty óristep otyrǵanyn aıtqanymyz jón. Sheteldik kompanııa basshylary tarapynan mundaı jaǵdaı qaıtalana berse, onyń sońy jumysshylar narazylyǵyn týdyrýy da múmkin.
AQTО́BE