Qyzylorda oblysynda azyq-túlik baǵasyn turaqtandyrýǵa baılanysty birqatar jumystar qolǵa alyndy. Ol boıynsha kúndelikti monıtorıng júrgizilip turady. Bul týraly oblys ákiminiń baspasóz qyzmeti habarlady.
Oblys ákimdiginde ótkizilgen turaqty keńeste maýsym aıyndaǵy azyq-túlik taýarlarynyń baǵasy jyl basyndaǵy kórsetkishpen (respýblıka boıynsha 101,7 paıyz) salystyrǵanda 101,6 paıyz quraǵan. Bul tusta «Qazagromarketıng» AQ júrgizgen saraptamalyq taldaýǵa júginsek, bıylǵy maýsym aıynyń basynda keıbir azyq-túlik taýarlarynyń baǵalary ótken aımen salystyrǵanda 30-80 teńge aralyǵynda tómendegen. Olardyń qatarynda qus eti, jumyrtqa, ósimdik maıy, qııar, pomıdor jáne taǵy basqalar bar. Jalpy aıtqanda, bul aımaqtaǵy 19 azyq-túlik taýarynyń baǵasy respýblıkadaǵy kórsetkishten tómen.
Saýda núktelerindegi taýarlardyń baǵasyna monıtorıng turaqty túrde júrgizilip turady.Onyń qorytyndysy jergilikti jerdegi buqaralyq aqparat quraldaryna jarııalanady. Al jyl basynan beri osy óńirde 5 aýyl sharýashylyǵy jármeńkesi ótkizilip, quny 11,5 mln. teńge bolatyn taýarlar satylǵan. Oblys ákimi Qyrymbek Kósherbaev osy baǵyttaǵy jumysty qarasha aıyna deıin jalǵastyrýdy jaýapty sala basshylaryna mindettep, jergilikti taýar óndirýshilerdiń ónimin ótkizý máselesi men áleýmettik mańyzy bar taýarlar baǵasyn udaıy nazarda ustaý qajettigin atap ótti.
Ámirhan Almaǵanbetov,
«Egemen Qazaqstan».