Almatydaǵy Balýan Sholaq atyndaǵy Mádenıet jáne sport saraıynda birqatar sheteldik jáne qazaqstandyq órenderdiń qatysýymen úlken kásipqoı boks keshi ótti. Asqar Salyqbaev jetekshilik etetin «MTK Global Kazakhstan» kompanııasy Táýelsizdik kúnine oraı «Rýhanı jańǵyrý» baǵdarlamasy aıasynda uıymdastyrǵan dodada 12 jup judyryqtasyp, eki birdeı altyn belbeý sarapqa salyndy.
Reıtıngtik básekede jeti qazaq boksshysy sharshy alańǵa shyǵyp, altaýy jeńiske jetti. Atap aıtsaq, Mırasáli Sársenov pen Raı Seıtjanov ázirbaıjandyq Asqar Ragımov pen Ramız Mamadovty, Elshat Nyǵmetolla men Nurtas Ájbenov fılıpındik Krıs Alfante men Lendı Krýs Leondy, Abaı Tólesh chehııalyq Tomash Bezvodany upaı sandarymen utty.
Birden aıta keteıik, bul kezdesýlerdiń birinde de jeńis jerlesterimizge ońaılyqpen kelgen joq. Jat elderden kelgen sportshylardyń barlyǵy da qarymdy eken. Kásipqoı bokstaǵy kareralaryn endi ǵana bastap júrgen qazaq jigitterine óz jankúıerlerin qýantý úshin sol jarysta kóp ter tógýge týra keldi.
Daryndy jas Nurdos Tólebaı men Ázirbaıjannyń ókili Nábı Abdýlaramızov arasyndaǵy jekpe-jek qana merziminen buryn aıaqtaldy. Birinshi raýndta qandasymyz qarsylasyn búıirden qatty uryp, qarsylasyn aýyr nokdaýnǵa jiberdi. Úzilisten keıin Qap taýynyń qyrany básekeni jalǵastyrýdan bas tartty.
Osy jarysta О́zbekstannyń eki birdeı óreniniń ónerin tamashaladyq. Ásirese, Rıo Olımpıadasynyń jeńimpazy, álem chempıonatynyń kúmis júldegeri Fazlıddın Gaıbnazarovtyń asqan sheberligine tánti boldyq, Dańqty boksshy ýkraınalyq Vladıslav Baranovty birinshi raýndta-aq uryp jyqty. Al Azııa oıyndary men qurlyq birinshiliginiń júldegeri Hýrshıd Tojıbaev ındonezııalyq Aızek Djýnıordy jeńdi.
Sol sekildi nıgerııalyq Alıý Bamıdele Lasızı men ındonezııalyq Hamson Lamandaý arasyndaǵy jekpe-jek te kóreremenderdiń kóńilinen shyqty. Rıngke qazaqtyń zerli shapanymen shyqqan qara qurlyq ókiline sport saraıyna jınalǵan jankúıerler birden qoldaý kórsete bastady. Sonyń áseri bolsa kerek, sharshy alańda ózin tym erkin sezingen Lasızı bul básekede kúmánsiz jeńiske jetti.
Jerlesterimizdiń arasynan tek Eskendir Harsannyń joly bolmady. Osy kúnge deıin jeti kezdesý ótkizip, barlyǵynda jeńiske jetken 22 jastaǵy tanymal bylǵary qolǵap sheberimiz bul joly kamerýndyq Tomas Essombaǵa ese jiberdi. Báseke bastalǵan bette Eskendir aýyr soqqy jiberip aldy. Sodan ol aıyǵa almady. Birinshi raýnda eki nokdaýn alsa, úshinshi raýndta tóreshi básekeni toqtatýǵa májbir boldy. Tehnıkalyq nokaýt!
Kesh sońynda eki birdeı altyn belbeý sarapqa salyndy. Qazaq jankúıerleri úlken senim artyp otyrǵan jalyndy jas Sultan Záýirbek Qytaıdan kelgen Leshan Lıdi utyp, ózine tıesili WBC Youth World Champion (jastar) nusqasynyń altyn belbeýin saqtap qaldy. Qarsylasynyń eki kózi birdeı isip ketip, kórýden qalǵandyqtan bul báseke merziminen buryn toqtatyldy.
Qazaqstanyń taǵy bir beldi boksshysy Vıktor Kotochıgov ózine tıesili WBC International nusqasynyń chempıondyq tájin qorǵap qalý úshin Argentınanyń azýly boksshysy Haver Hose Klaveromen kúsh synasty. 10 raýndtyq saıystyń qorytyndysy boıynsha jeńis biraýyzdan jerlesimizge berildi. Osylaısha, eki altyn belbeý de elde qaldy.
Esterińizge sala keteıik, bul básekeler otandyq «Qazsport» arnasynan bólek, AQSh-tyń áıgili ESPN telearnasy arqyly tórtkúl dúnıeniń 60-tan asa memleketinde tikeleı efırden kórsetiledi. Sondaı-aq, iFL TV ıýtýb jobasy da arqyly bul jarys álemniń basqa da aımaǵyna keńinen taratyldy. Osynyń barlyǵy Qazaqstannyń kásipqoı boksynyń shartarapqa taralýyna oń yqpal etetini sózsiz.
Sóz oraıy kelgende birqatar jergilikti jáne sheteldik kompanııalar jáne Almaty qalasynyń ákimdiginiń qoldaýymen ótken jarysqa Qazaqstannyń bylǵary qolǵap sheberlerin Saǵatbek Musahanov, Qanat Áltaev jáne Dastan Sádýaqasov syndy bilikti bapkerler daıyndady.