О́tip bara jatqan jyldyń sońǵy kúnderinde Qazaly aýdanynda Álseıit kópiri qoldanysqa berildi. Osyǵan oraı ótken jıynǵa qazalylyqtarmen qatar kórshiles Aral aýdany turǵyndary da qatysty. Aýdanǵa arnaıy saparlap barǵan oblys ákimi Qýanyshbek Ysqaqov jyl toǵysyndaǵy jańalyqqa oraı jurtshylyqty quttyqtady.
– Halqymyz ejelden-aq shólge qudyq qazǵan, ózenge kópir salǵan jáne jolǵa aǵash ekken eń úlken saýapty is ekenin aıtady. Dıqandyqty baba dástúri sanaǵan Syr boıynda kópirler qurylysy ótken ǵasyrlarda da boldy. Qaraózek tusyndaǵy Saýranbaı kópiri, Josaly kentindegi Qarmaqshy ótkeli, Qyzylorda qalasyndaǵy Ospan kópiri kesheginiń kózindeı tarıhı nysandar. Búginde biz ata-babamyzdyń kópir salý dástúrin zamanaýı úlgide jańǵyrtyp, damytyp kelemiz. Sonyń bir dáleli osy kópir. Qýanyshtaryńyz qutty bolsyn, – dedi aımaq basshysy.
Qazaly aýdanynyń 7 aýyly men kórshiles Aral aýdanyna qarasty alty aýylda turatyn 20 myńǵa jýyq turǵyn osy kópirdi uzaq jyl kútipti. Jıynda jergilikti turǵyndardyń atynan lebiz bildirip, bata bergen Bekarystan bı aýylynyń turǵyny, Uly Otan soǵysynyń ardageri, «Qyzyl Juldyz» ordeniniń ıegeri Qabaq Smaǵulov kópir máselesin alǵash ret sonaý 1949 jyly el aqsaqaldary kótergenin eske aldy.
Oblystyq jolaýshylar kóligi jáne avtomobıl joldary basqarmasynyń tapsyrysy boıynsha salynǵan kópirdiń jalpy uzyndyǵy 219 metr, 2 jolaqty, eni 12 metr. Kópirdiń eki jaǵynan 1,5 metr jaıaý júrginshiler joly qarastyrylǵan. Jalpy quny 2,7 mlrd teńge bolatyn qurylystyń bas merdigeri «KA-Stroı LTD» jaýapkershiligi shekteýli seriktestigi. Jańa kópirden alǵash ret osy kompanııa kólikteri júrip ótti.
Qyzylorda