Birinshi qańtardan bastap tolyqtaı kúshine engen MÁMS júıesi sheńberinde halyqty medısınalyq kómekpen qamtý deńgeıi Túrkistan oblysy boıynsha 91,6%-dy quraıdy. О́ńir halqynyń 8,4%-y nemese 66652 adam «shartty túrde saqtandyrylmaǵan» bolyp esepteledi, olar boıynsha mártebeni ózektendirý jumystary jalǵasýda. Oblys boıynsha 114 densaýlyq saqtaý mekemesi tirkelgen.
Túrkistan oblysynyń «MSQ» KEAQ fılıaly ótken jyly 73 ónim berýshimen shart jasaǵan, onyń ishinde memlekettik - 40, jeke - 33 uıym bar. Bul derekterdi Densaýlyq saqtaý mınıstrliginiń óńirde mindetti áleýmettik medısınalyq saqtandyrýdyń engizilýine tekserý júrgizgen shtab músheleri málim etti. Mınıstrliktiń strategııa jáne halyqaralyq yntymaqtastyq departamentiniń basshysy Aınur Aıtahanova bastaǵan delegasııa quramy aldymen oblystyq klınıkalyq aýrýhanada boldy.
Emhananyń jumysymen, qabyldaý bólimindegi TRIAJ júıesimen, ońaltý bóliminde ınsýlttan keıin em qabyldap jatqan naýqastardyń jaı-kúıimen tanysty. Mekemede halyqtyń yńǵaılylyǵy úshin MÁMS-ke jarna tóleý úshin arnaıy termınaldar jumys istep tur. Jumys toby, sondaı-aq, oblystyq № 1-shi perınataldyq ortalyq pen Saryaǵash aýdandyq ortalyq aýrýhanada boldy. 512 tósek orynǵa eseptelgen aýdandyq aýrýhana 100 paıyz sıfrlandyrý júıesine kóshken. Taıaýda ǵana ashylǵan jaraqat beketi táýlik boıy qyzmet kórsetedi. Zamanaýı úlgidegi kompıýterlik tomografııa da aýyl turǵyndaryna dıagnostıka turǵysynda úlken kómegin tıgizip keledi. Jumysshy top munan keıin Tólebı aýdandyq aýrýhana men MÁMS qorymen kelisim shartqa otyrǵan jekemenshik medısınalyq uıymdardyń da jumystarymen tanysty.