Qurlyqtyq hokkeı lıgasyndaǵy (QHL) kezekti týr oıynyn Ekaterınbýrgte ótkizgen Nur-Sultannyń «Barysy» jergilikti «Avtomobılısten» basym tústi.
Birinshi kezeńde Korben Naıt soqqan goldan keıin qonaqtar alǵa shyqty. Úzilisten keıin aıdyn ıeleri esepti teńestirdi. Biraq jergilikti jankúıerlerdiń bul qýanyshy uzaqqa sozylmady. 32 mınýtta Nıkıta Mıhaılıs pen 39 mınýtta Lınýs Vıdell nysanany dál kózdedi. Úshinshi kezeńde Evgenıı Mozer esep aıyrmashylyǵyn qysqartqanymen, básekeniń aıaqtalýyna 19 sekýnd qalǵanda Dastın Boıd matchtyń sońǵy núktesin qoıdy. Esep – 2:4.
Qazirgi kezde «Barys» turaqty birinshiliktiń jarys kestesinde altynshy orynda keledi. Shyǵys konferensııasynda bizdiń jigitter úshinshi satyǵa jaıǵasty. Chempıonat bastalǵaly beri barlyǵy 53 báseke ótkizgen jerlesterimiz 69 upaıdy ıelenýde.
О́ziniń kelesi kezdesýin elordalyq hokkeıshiler 30 qańtarda Nur-Sultanda Nıjnekamskiniń «Neftehımıgine» qarsy ótkizedi.