Qarjy polısııasy qylmystyq aktıvterdi anyqtaý jáne qaıtarý boıynsha jumys júrgizýde. Bul týraly BNews.kz habarlady.
«Qarjy polısııasy organdary qylmystyq jolmen tabylǵan jáne Qazaqstannan shetelderge shyǵarylǵan aktıvterdi anyqtaý jáne qaıtarý boıynsha jumysty júrgizýde», dep kórsetilgen jazbada.
Máselen, Hrapýnovtardyń uıymdasqan qylmystyq tobyna qatysty qylmystyq isti tergeý barysynda Qarjy polısıasy agenttigi Shveısar konfederasııasynyń quzyretti organdaryna qylmystyq is boıynsha quqyqtyq kómek kórsetý týraly halyqaralyq tapsyrma jiberdi.
Quqyqtyq kómek kórsetý týraly tapsyrmada kórsetilgen qujattar men dáıekter Shveısarııanyń ýákiletti organdarymen saralanyp, nátıjesinde Hrapýnovtarǵa qatysty Shveısar konfederasııasynyń aýmaǵynda qylmystyq jolmen tabylǵan kapıtaldy zańdastyrý faktisi boıynsha qylmystyq qýdalaý bastaldy.
Qazirgi kezde Shveısarııanyń quzyretti organdary Hrapýnovtar januıasynyń akıvterine olardyń zańdylyǵyn anyqtaǵanǵa deıin tyıym saldy. Tanysý jáne qylmystyq is fıgýranttarynyń is-áreketine quqyqtyq baǵa berý úshin bankilik, qarjylyq jáne ózge de qujattary alyndy.
Sonymen birge, Shveısar konfederasııasynyń Federaldyq prokýratýrasy Rysqalıevterge qylmystyq jolmen tabylǵan aqshalaı qarajatty zańdastyrý faktisi boıynsha qylmystyq tergeý júrgizýde.
Tergeý aıasynda Rysqalıevter men olardyń jaqyn týystaryna tıesili Shveısarııa bankilerinde jalpy sommasy 100 mln evrodan asatyn aıtarlyqtaı aqshalaı qarajat salynǵan 3 bankilik esep-shot anyqtaldy.
Federaldyq prokýratýra atalǵan shottarǵa tyıym saldy.
Qarjy polısııasy agentigi óz qyzmetkerleriniń Shveısar konfederasııasy aýmaǵynda tergeý amaldaryn júrgizýge ruqsat berý týraly halyqaralyq tapsyrma joldady.
Qaırat Qojanazar.