Nursultan Nazarbaev Amerıka Qurama Shtattarynyń Memlekettik hatshysy Maık Pompeomen kezdesti. Bul týraly elbasynyń resmı saıty habarlady.
Áńgime barysynda Maık Pompeo Qazaqstannyń Tuńǵysh Prezıdentine AQSh Prezıdenti Donald Tramptyń jyly lebizderin jetkizdi.
Nursultan Nazarbaev eki eldiń strategııalyq seriktestigin nyǵaıtýa baǵyttalǵan birlesken kúsh-jiger men qabyldanǵan sharalardy atap ótti.
– Táýelsizdiktiń bastapqy kezeńinde biz «Shevron» kompanııasymen kelisim jasadyq. Osy sátten bastap Qazaqstanǵa amerıkandyq ınvestısııalar keldi. Búgingi tańda bizde 410 birlesken kásiporyn bar. Amerıkandyq ınvestısııalardyń kólemi 45 mıllıard dollardan asty, - dedi Elbasy.
О́z kezeginde Maık Pompeo Qazaqstanǵa sapary jáne kelissózderdiń nátıjeleri týraly aıtty.
– Men Prezıdent Qasym-Jomart Toqaevpen jáne Qazaqstannyń Syrtqy ister mınıstrimen mańyzdy kezdesýler men kelissózder ótkizdim. Siz Amerıka Qurama Shtattarynyń burynnan kele jatqan dosysyz. Elderimizdiń arasynda ózara tıimdi seriktestik qalyptasqan. Qazaqstandaǵy oń ózgerister Sizdiń jeke eńbegińiz dep bilemin. Eldiń damý deńgeıi de meni tánti etti, - dedi AQSh-tyń Memlekettik hatshysy.