Uly Abaıdyń týǵanyna 175 jyldyǵyna arnalǵan memlekettik mańyzdy kezekti shara aqyndar men batyrlar eli – Jambyl aýdanynda, «HH ǵasyrdyń Gomeri» atanǵan Uly aqynnyń murajaıynda ótti.
Halyqaralyq Jambyl qorynyń tóraǵasy, Abaı atyndaǵy Qazaq ulttyq pedagogıkalyq ýnıversıtetiniń ǵylymı qyzmetkeri, belgili aqyn Manarbek Izbasar «Bizdiń ýnıversıtet rektory Takır Balyqbaevtyń sheshimine oraı atalmysh sharaǵa saı oqý ornynyń aldyndaǵy uly aqyn eskertkishi túbinde jyl aıaǵyna deıin mezgil-mezgil fleshmob uıymdastyrylyp turatyn boldy. Ol basqosýda ustazdar men stýdentter Abaı jyrlaryn oqıdy, qara sózin jatqa aıtady, tarıhı qyzyqty derekterdi ortaǵa salady. Uly Jambyl murajaıyna Almatydan búgingi arnaıy atbasyn burýymyz sol sharamen laıyqty úndestik tabady ǵoı dep bilemin» dedi.
Jambyl aýdany ákiminiń orynbasary Ádilbek Dalabaev almatylyq qonaqtar men jınalǵan qaýymdy aqyn atyndaǵy aýdanda uly Abaıǵa arnalyp ótetin, ótip jatqan is-sharalar barysymen tanystyrdy. Saltanatty jıynǵa qatysýshylardyń aldy bolyp Jambyl aýdany men Almaty oblysynyń Qurmetti azamaty, Mádenıet qaıratkeri, aqyn Orysbaı Ábdildauly sóz sóıledi:
– Bizdiń aýylymyzda ótip jatqan uly Abaı babamyzdyń rýhyn kótergen bul júzdesý – ulan-asyr úlken toıdyń basy. Abaı – qazaqtyń túp qazyǵy, Abaı ilimi qazaqtyń – bas ıdeologııasy. Meniń bala kezimde oqýshy dápteriniń syrtynda aqynnyń «Ǵylym tappaı maqtanba» degen sózi kóz salǵan janǵa shamshyraqtaı áser berip, jazylyp turatyn. Ol qazir jazylmaıdy. О́ıtkeni, Abaıdyń ol aqyly qazaqtyń qanyna sińdi deıtin sııaqtymyz. Joq. Urpaq aýysyp, býyn almasyp turady. Sondyqtan jas urpaqty tárbıeleıtin sol dástúr jalǵasýy kerek.
Jumabaı ShAShTAIULY,
jazýshy, Halyqaralyq «Alash» syılyǵynyń ıegeri, Qazaqstannyń eńbek sińirgen qaıratkeri:
– Dańqty kompozıtor Nurǵısa Tilendıev aǵamyzdyń aýzynan estigen myna bir aqıqat sóz esimnen esh ketpeıdi. Jambyl atamyzǵa Almatydan sálem bere kelgen kil myqty jazýshylar synamaq úshin be eken, birde... Jákeńe «Osy Abaı qandaı aqyn?» degen saýal qoıypty. Sonda sál oılanyńqyrap qalǵan ǵasyrdyń qurdasy úzip alǵandaı «Abaı – aqyn ba?..» dep kidiripti. Qaýmalaǵan jurt – pende. Ataǵy aıǵa jetip turǵan aqyn munysymen ne aıtpaq boldy eken dep ishten tyna qalady. Sonda Jambyl tátem «Abaı aqyn emes, Abaı – Paıǵambar!» degen eken. Mine, uly Abaıǵa bergen uly Jambyldyń baǵasy.
Doqtyrhan TURLYBEK,
jazýshy, ýnıversıtettiń «Abaı» telestýdııasynyń dırektory:
–Taıaýda maǵan bir jas óren keldi. Abaıdyń 175 jyldyǵyna oraı derekti fılm túsirmek oıy bar eken. Sol úshin beınekamera kerek deıdi. Qýana qoldadym. Kezdeısoq rejısserdiń baǵyt baǵdarlamasymen tanysý barysynda onyń Abaı shyǵarmalarymen shala tanys, tipti «Abaı jolyn» oqymaǵanyn bildim. «Oqyp alamyn, qazir tezdetip aqynnyń beınesin jasaǵym keledi», deıdi. Amal qansha, qazirgi qoǵamdaǵy keıbir jetkinshekterimizdiń búgingi bolmysy, uly oıshylǵa degen kózqarasy osyndaı... Kiná – ózimizden!
Nurmanbet QIZATULY,
Qazaqstan jýrnalıstıkasynyń qaıratkeri, Halyqaralyq Jambyl syılyǵynyń ıegeri:
– Uly oıshylymyz Abaı óziniń Jıyrma ekinshi qara sózinde bylaı deıdi: «Bolys pen bıdi qurmetteıin deseń, qudaıdyń ózi bergen bolystyq pen bılik elde joq. Satyp alǵan, jalynyp, bas uryp alǵan bolystyq pen bıliktiń eshbir qasıeti joq. Myqtyny syılaıyn deseń, jamanshylyqqa eldiń bári myqty, jaqsylyqqa myqty kisi elde joq. Esti kisini taýyp qurmetteıin deseń, ádilet, uıat, nysapqa esti kisi elde joq. Qýlyq, sumdyq, aramdyq amalǵa eldiń bári de esti...» Ǵulamanyń budan bir ǵasyr buryn bizdiń búginimizdi tereńnen boljap, salmaqtap, tarazylap ketkenine, danyshpandyq talǵamyna tań qalýmen, tańdanýmen kelemin...
Uly Abaıdyń mereıtoıyna baılanysty ótken asa qyzyqty da mazmundy pikir almasýlardan soń aýdandyq «Qulansaz» án-bı ansambliniń ártisteri Abaı ánderin tamyljyta shyrqady. Osyndaǵy Jambyl atyndaǵy orta mekteptiń oqýshylary aqynnyń jyrlaryn kezek-kezek jatqa oqydy. Muraıjaıdyń konferens-zalyna lyq tolǵan kórermen-kópshiliktiń qulaq quryshy qanyp, bir sergip qalǵandaı áserge bólendi.
Uly Abaı mereıtoıynyń aıaǵyn ala uly Jambyldyń dál osyndaı 175 jyldyq mereıtoıy bastaý alatynyn naq biletin halyq murajaıdaǵy kezdesýde qazaq ádebıetiniń qos alybynyń rýhyna tik turyp bas ıip taǵzym etti, qol soqty.
Almaty oblysy,
Jambyl aýdany