Jýyrda Aqmola oblysy ákimdigi men «Shevron» kompanııasy arasynda Ereımentaý aýdanyndaǵy «Samal» jel qýaty parki jobasyn júzege asyrýǵa qatysty ózara yntymaqty kelisim-shartqa qol qoıý rásimi boldy.
Jýyrda Aqmola oblysy ákimdigi men «Shevron» kompanııasy arasynda Ereımentaý aýdanyndaǵy «Samal» jel qýaty parki jobasyn júzege asyrýǵa qatysty ózara yntymaqty kelisim-shartqa qol qoıý rásimi boldy.
«Shevron» kompanııasy Eýrazııa bólimshesiniń basqarýshy dırektorynyń orynbasary Imır Bonner óz sózinde jel qýaty álemniń damyǵan elderiniń barlyǵynda tıimdi paıdalanylyp kele jatqandyǵyn aıtty. Al, «Samal» jel parkiniń qurylysy Qazaqstandaǵy iri sheteldik ınvestısııalyq jobalardyń biri bolyp tabylady. Kásiporyn osy joba aıasynda aldaǵy ýaqytta Ereımentaý qalasynyń mańynda jelden elektr qýatyn óndiretin qondyrǵy qoıýdy uıǵaryp otyr. Bolashaqta Ereımentaý qalasynda qýaty 50 megavattyq stansa salynatyn bolady. Qazaqstanda balamaly jáne jańartylatyn energetıkany damytý jónindegi 2013-2020 jyldarǵa arnalǵan is-sharalar josparyna engizilgen quny 239 mıllıon dollardy quraıtyn jobany kompanııa ózderi qarjylandyratyn bolady. Sondaı-aq, kompanııa áleýmettik ınvestısııalar baǵdarlamasy aıasynda Ereımentaý aýdanynyń bilim berý, densaýlyq saqtaý mekemelerine 30 mıllıon teńgeniń qural-jabdyqtaryn syıǵa tartqanyn oqyrmandarymyzǵa jetkizgenbiz.
Jel parkiniń qurylysy arqyly arzan elektr qýatyn óndirýmen birge qorshaǵan ortany taza ustaýǵa tikeleı yqpal etetin bul jobanyń oblys úshin asa mańyzdy ekendigine toqtalǵan oblys ákimi Qosman Aıtmuhametov Qazaqstan Respýblıkasynyń Jer zańnamasy sheńberinde jel parkiniń qurylysy úshin ınvestorlardyń 622 gektar jer ýchaskesin 49 jylǵa ýaqytsha qaıtarymdy paıdalaný quqyn alýyna qoldaý kórsetiletindigin jáne atalǵan jobanyń jaqyn arada ındýstrııalandyrý kartasyna engiziletindigin jetkizdi.
Bıyl Qazaqstan men «Shevron» kompanııasynyń jemisti seriktestigine 20 jylǵa aıaq basty. Kásiporyn osy ýaqyt ishinde Qazaqstanda ınvestorlarǵa qolaıly jaǵdaı jasalǵanyn, bul elde erkin jumys isteýge bolatynyn ózgelerge dáleldedi. Osy kásiporynnyń arqasynda Qazaqstanǵa 8,5 myń sheteldik kompanııa 200 mıllıard dollardan astam ınvestısııa quıdy. 20 jylda kásiporyn elimizde birneshe zaýyttardyń ashylýyna septigin tıgizdi. TMD elderinde balamasy joq Atyraý qubyr armatýrasy zaýyty Qazaqstan men «Shevron» kompanııasynyń birlesken jobasy bolyp sanalady.
Baqbergen AMALBEK,
«Egemen Qazaqstan».
Aqmola oblysy.