Keshe Premer-Mınıstr Kárim Másimovtiń tóraǵalyǵymen ótken Úkimet otyrysynda 2010 jylǵa arnalǵan respýblıkalyq bıýdjettiń naqtylanǵan jobasy qaraldy.Osy másele boıynsha baıandama jasaǵan Qarjy mınıstri Bolat Jámishev respýblıkalyq bıýdjetti naqtylaý Memleket basshysy Nursultan Nazarbaevtyń el halqyna arnaǵan jańa Joldaýyn júzege asyrý úshin qajet bolǵandyǵyn atap kórsetti. Joldaýda keıbir basymdyq berilip otyrǵan máselelerge qosymsha qarjy bólý jaıynda aıtylǵan bolatyn. Máselen, Elbasy respýblıkalyq bıýdjet salasy qyzmetkerleriniń jalaqysy men memlekettik stıpendııalardy 25 paıyzǵa arttyrý isin buryn kózdelgendegideı ústimizdegi jyldyń 1 shildesinen emes, 1 sáýirden bastaý jóninde tapsyrma bergen edi.
Bolat Jámishev óz sózinde osy máselege baılanysty respýblıkalyq bıýdjet esebinen qosymsha 53,8 mıllıard teńgeniń qarjysy qarastyrylatyndyǵyn jetkizdi.
Sonymen qatar, elimizdiń údemeli ındýstrııalyq-ınnovasııalyq damýynyń 2010-2014 jyldarǵa arnalǵan memlekettik baǵdarlamasyn júzege asyrý úshin 143,8 mıllıard teńge, “Bıznestiń jol kartasy-2020” jobasyn júzege asyrýǵa 30 mıllıard teńge, “Investor-2020”, “Eksporttaýshy-2020”, “О́nimdilik-2020” baǵdarlamalaryn júzege asyrý arqyly shıkizattyq emes sektordy damytý sharalaryna 5 mıllıard teńge, ınfraqurylymdyq jobalardy júzege asyrý úshin “Samuryq-Qazyna” ál-aýqat qorynyń jarǵylyq kapıtalyn arttyrýǵa 62,8 mıllıard teńge, agroónerkásiptik keshendi damytý úshin “Qazagro” holdıngine 28 mıllıard teńge, ǵarysh salasyn damytýǵa 7 mıllıard teńge, “Qorǵas” kedeniniń ınfraqurylymdaryn jetildirýge 6 mıllıard teńge, Astanadaǵy jańa ýnıversıtettiń ekinshi kezeginiń qurylysyna 5 mıllıard teńge qarastyrylatyn boldy.
Sonymen qatar Astana jáne Almaty qalalarynda 2011 jyly Qysqy Azııa oıyndaryn ótkizý úshin daıyndyq pen tıisti ınfraqurylymdardy damytý úshin 44,4 mıllıard teńge qarastyrylmaq.
Elbasy tapsyrmasymen elimizdegi balalar baqshasy men mektepke deıingi mekemeler júıesin jetildirý úshin “Balapan” baǵdarlamasynyń ázirlengendigi belgili. Osy baǵdarlamany júzege asyrý úshin de kólemdi qarjy bólinetin boldy.
Respýblıkalyq bıýdjette qosymsha qarastyrylyp otyrǵan atalǵan shyǵyndardy jabý úshin bıýdjettiń kiris bóligi de arttyrylatyndyǵy belgili. Bul qarjy qaıdan paıda bolyp otyr? Premer-Mınıstrdiń osy máselege baılanysty saýalyna oraı Bolat Jámishev elimizdiń Belarýs jáne Reseı elderimen Keden odaǵyna birigýine baılanysty ústimizdegi jyldyń ózinde bıýdjetke 61 mıllıard teńgeniń qosymsha kirisi paıda bolady degen boljam jasalǵandyǵyn atap kórsetti. Mine, bıýdjettik sala qyzmetkerleriniń jalaqysy men stýdentterdiń memlekettik stıpendııalaryn óteý úshin qajet bolyp otyrǵan 53,8 mıllıard teńge qarjy osyndaı joldar arqyly ótelmek. Osyǵan qaraǵanda elimizdiń Keden odaǵyna qosylýy memleketke qarjylaı turǵydan paıdaly bolyp shyqqandyǵyn baıqaýǵa bolady. Premer-Mınıstr óz sózinde osy bir jaǵdaıǵa ekpin túsirip ótti.
Otyrysta sondaı-aq Eńbek jáne halyqty áleýmettik qorǵaý, Bilim jáne ǵylym, Aýyl sharýashylyǵy mınıstrleri Gúlshara Ábdihalyqova, Janseıit Túımebaev, Aqylbek Kúrishbaev, Premer-Mınıstrdiń orynbasarlary Áset Isekeshev, Erbol Orynbaev, О́mirzaq Shókeev sóz alyp, bıýdjetten bólinetin qosymsha qarjylardyń jumsalý joldary týraly aıtyp berdi. Olardyń sózderine qaraǵanda bıýdjetten ekonomıkalyq blok úshin bólinip otyrǵan qarjy túbinde elimiz úshin ıgilikti qyzmet atqaryp, el baılyǵyn eseleýge járdemdespek. Máselen, qazirgi kúni Qazaqstannyń Reseı rynogyna et eksportynyń kólemi 1 myń tonnaǵa da jetpeıtin bolsa, bolashaqta qurylǵan Keden odaǵynyń beretin múmkindikterin paıdalana otyryp, taıaýdaǵy 3 jyldyń ózinde ǵana onyń kólemin 60 myń tonnaǵa deıin jetkizý kózdelip otyr. “Qazagro” holdıngi úshin bólinetin qarjy osyndaı maqsat úshin qyzmet etpek.
Kún tártibinde qaralǵan ekinshi máselede elektrondy memlekettik satyp alý isin uıymdastyrý jaıy sóz boldy. Osy másele jóninde de baıandama jasaǵan Qarjy mınıstri Bolat Jámishevtiń aıtýynsha, bıylǵy jyldan bastaý alǵan bul joba qazirdiń ózinde edáýir tıimdilik berip otyr eken.
Úkimet otyrysyn Premer-Mınıstr Kárim Másimov qorytyndylap, qaralyp otyrǵan máselelerge baılanysty tıisti tapsyrmalar berdi.
Suńǵat ÁLIPBAI.