Jýyrda Almatydaǵy Ulttyq kitaphanada Qazaqstan Jazýshylar odaǵy basqarmasynyń muryndyq bolýymen Jazýshylar odaǵynyń 75 jyldyǵy aıasynda belgili qart jazýshy-pýblısıst Sapabek Ásipulynyń “Qaýqarsyz qazaq máselesi” atty kitabynyń tusaýkeseri boldy. Basqosý tizginin alǵan Qazaqstan Jazýshylar odaǵy basqarma tóraǵasynyń birinshi orynbasary, Halyqaralyq “Alash” ádebı syılyǵynyń laýreaty, belgili aqyn Ǵalym Jaılybaı jasy seksenniń seńgirine kóterilgen qart qalamger Sapabek Ásipulynyń shyǵarmashylyǵyna, qoǵam ómirindegi belsendiligine, ásirese, ult taǵdyryna qatysty máselede aıryqsha qyzmet jasap júrgenine toqtaldy. Alqaly jıyndarda jas urpaqtyń keleshegi, jer, basqa da ózekti máseleler tóńiregindegi ótkir de oıly pikirlerin ashyq bildire alatyn qaıratkerlik qasıetin atap ótti. Qart qalamgerdiń ıyǵyna kúlli áriptesteriniń atynan shapan jaýyp, qurmet kórsetti.
Belgili aqyn, M.Maqataev atyndaǵy syılyqtyń laýreaty Amanhan Álim S.Ásipulynyń shyǵarmashylyǵy jóninde mazmundy baıandama jasady. Sodan soń jańa týyndy týraly, sondaı-aq, Sapabek Ásipulynyń aqsaqaldyq, azamattyq, qaıratkerlik qasıetteri týraly kóptegen aqyn-jazýshylar, zııaly qaýym ókilderi ózekjardy oı-pikirlerin bildirdi.
Tusaýkeser rásimine qatysýshylar Ulttyq kitaphana ázirlegen Sapabek Ásipulynyń shyǵarmashylyǵyna arnalǵan kitap kórmesin tamashalady.
Serikjan QAJI, Qazaqstan Jazýshylar odaǵynyń aǵa referenti. Almaty.