Jýyrda SQO polısııasy medısınalyq mekemelerdi tekserip, olardyń birazynyń basshylaryn quramynda esirtkisi bar preparattardy nusqaýlyqqa sáıkes qoldanbaǵandary úshin jaýapkershilikke tartty.
«Dármek» dep atalatyn bul operasııanyń maqsaty – quramynda esirtki zattary bar dárilerdiń aınalymǵa enip, qylmys áleminiń olardy teris paıdalanýyn boldyrmaýǵa baǵyttalǵan edi. Tekserispen medısınalyq mekemelermen qatar dárihanalar men ónerkásiptik kásiporyndar da qamtyldy.
Tekseris barysynda qylmys álemine esirtkiniń enip ketýine múmkindik beretin segiz jaǵdaı anyqtaldy. Máselen, medısınalyq mekemelerdiń birinde quramynda esirtki zattary bar preparattardyń saqtalýy men kúzeti álsiz bolǵany úshin onyń basshysyna aıyppul salynatyn boldy. Zań boıynsha mundaıǵa 100 AEK kólemindegi aıyppul qarastyrylǵan. Taǵy bir mekemede quramynda kodeıni bar preparat resepsiz satylǵan. Quramynda esirtki zaty bar amplýalar ashylyp, preparaty alynǵannan keıin shynysy birden joıylýy kerek eken. Al bir mekemede olar eki aıdan beri saqtalǵan. Tıisinshe bul mekemeniń basshysyna da aıyppul salyndy.
Tekserýshiler barlyǵy 393 tabletka men 26 amplýny tárkiledi. Esirtkiniń zańsyz aınalýynyń 11 faktysynyń aldyn aldy. Sonyń arqasynda 830 grammnyń esirtkisi aınalymǵa enbedi, onyń ishindegi 777,1 grammy «spaıs» atty psıhobelsendi zat. «Oblystaǵy quramynda esirtkisi bar zattar men psıhotropty zattar aınalymy jalpy aıtqanda baqylaýda. Degenmen Petropavl qalasynyń bir aýdanynda olardyń aınalysynan buzýshylyqtar tabylyp, medısınalyq mekemelerdiń basshylaryna aıyppul salyndy», deıdi SQO PD esirtkige qarsy kúres basqarmasynyń bastyǵy Jandos Basybaev.
Soltústik Qazaqstan oblysy