Azamattar Halyqqa qyzmet kórsetý ortalyqtary men memlekettik mekemelerge júginbeı, 80 paıyzdan astam memlekettik qyzmetterdi úıden shyqpaı-aq elektrondy túrde ala alady. Bul týraly Memlekettik qyzmet isteri agenttiginiń tóraǵasy Anar Jaıylǵanova málimdedi.
- Dúnıejúzilik Densaýlyq saqtaý uıymynyń koronavırýsty pandemııa dep jarııalaýyna jáne el Prezıdentiniń Tótenshe jaǵdaıdy engizýine baılanysty memlekettik aqparatqa halyq tynys-tirshiliginiń barlyq salalarynyń úzdiksiz jumysyn qamtamasyz etý boıynsha úlken jaýapkershilik júktelgen. Búgin biz jańa talaptar jaǵdaıynda barynsha birlese otyryp aldyn ala áreket etýimiz kerek. Buǵan bizdiń Memleket basshymyz shaqyrýda. Bul kúnderi bizdiń azamattar Halyqqa qyzmet kórsetý ortalyqtary men memlekettik mekemelerge júginbeı, qajetti kórsetiletin qyzmetter kólemin alýlaryn qamtamasyz etý úshin memlekettik qyzmetshiler barynsha úılesimdi jumys isteýleri kerek. Qazirgi ýaqytta memlekettik kórsetiletin qyzmetterdi elektrondy formatqa kóshirý boıynsha memlekettik organdardyń belsendi qyzmetiniń arqasynda azamattar úıden shyqpaı-aq elektrondy túrde 80 paıyzdan astam memlekettik qyzmetti alýǵa múmkindigi bar, - dedi Memlekettik qyzmet isteri agenttiginiń tóraǵasy Anar Jaıylǵanova
Sondaı-aq ol tótenshe jaǵdaı kezeńinde azamattardyń jaılylyǵy memlekettik organdardyń jumysyna baılanysty ekenin atap ótti.
- Azamattardyń memleket qyzmetti qashyqtan alýy, sonyń ishinde ótinishterdi memlekettik organdardyń call-ortalyqtary jáne onlaın qabyldaý arqyly qabyldaý úshin aqparattyq júıeler men portaldardyń úzdiksiz jumys isteýine erekshe nazar aýdarý qajet, - dedi ol.