Almaty qalasy Polısııa departamentiniń basshysy Qanat Taımerdenov qaladaǵy karantındik rejımdi túsindirdi.
– Ishki ister mınıstriniń buıryǵymen jeke quram qyzmettiń kúsheıtilgen nusqasyna kóshirildi. Polısııanyń basty mindeti – qoǵamdyq tártipti saqtaý jáne azamattardyń qaýipsizdigin qamtamasyz etý. Qazirgi ýaqytta departament koronavırýstyq ınfeksııanyń taralýyn boldyrmaý úshin onymen kúresý sharalaryn júrgizýde. Múddeli memlekettik organdar qyzmetkerlerimen birlese otyryp ınfeksııa juqtyrǵan adamdarmen tikeleı baılanysta bolǵan tulǵalardy izdestirý sharalary júrgizilýde. Búgingi kúni osyndaı 798 azamat anyqtalyp, olar medısınalyq mekemelerge jetkizildi, – dedi Qanat Taımerdenov.
Sondaı-aq ol erekshe mańyzǵa ıe memlekettik nysandar men mekemelerdi táýlik boıy kúzetý júzege asyrylatynyn atap ótti.
– Prezıdent janyndaǵy Tótenshe jaǵdaıdy qamtamasyz etý jónindegi memlekettik komıssııanyń sheshimimen 19 naýryzda saǵat 00.00-den bastap karantın rejımi engiziledi. Basty maqsat – qalanyń syrtqy aýmaǵyn baqylap, qalanyń ishindegi karantın rejımin qatań qadaǵalaý arqyly ınfeksııanyń taralýyn toqtatý. Almatynyń shekaralaryna avtokóliktiń kirýi men shyǵýyna shekteý qoıylady. Soǵan baılanysty qalanyń barlyq kireberisterine jáne on magıstralǵa 27 blok-beket qoıylady. Sol jerge kúndelikti polısııa qyzmetkerleri men Qorǵanys mınıstrliginiń jaýyngerleri jumyldyrylady, – dedi ol.
Budan soń, Qanat Taımerdenov Polısııa departamentinde arnaıy call-ortalyq jumys isteıtinin aıtty.
– Polısııa departamentindegi call-ortalyq 254-40-07 nómirimen jumys isteıdi. Bul ortalyq azamattar tarapynan týyndaǵan máselelerdi qarastyryp, barlyq suraqtaryna shuǵyl jaýap beriledi. Qurmetti azamattar! Sizderdiń Ishki ister organdary tarapynan jasalyp jatqan sharalarǵa túsinistikpen qaraýlaryńyzdy suraımyz. О́ıtkeni, olar sizdiń jáne sizdiń jaqyndaryńyz úshin qabyldanyp jatqan shara, – dedi Q. Taımerdenov.