Qostanaıda memleketten tegin bólinetin dári-dármek preparattaryn naýqastardyń úıine eriktiler jetkizip bere bastady.
Olar ózderiniń aty-jóni, mekenjaıy, telefon nómirlerin tirkep, dárigerlerden nusqaý aldy. Emhana ár eriktige eki medısınalyq maska, qol súrtetin suıyqtyq ustatty. Endi olar bir aıdyń ishinde 4 myń naýqasqa dári-dármek aparyp berýi tıis.
– 17 naýryz kúni joǵarydan «Ambýlatorııalyq emdeý mekemelerinde turǵyndarǵa kórsetiletin tegin medısınalyq kómektiń kepildendirilgen kólemi boıynsha dári-dármek preparattaryn naýqastyń turǵylyqty mekenjaıyna jetkizip berý qamtamasyz etilsin» degen nusqaý aldyq. О́zderińiz bilesizder, bizde qazir jumys qaýyrt, feldsherlerdiń qoly tıe bermeıdi. Sondyqtan sizderdiń kómekterińizge júginýge týra kelip otyr. Barshamyzǵa ortaq qaıyrymdy iske atsalysýǵa nıet bildirgenderińiz úshin shyn júrekten alǵysymdy aıtamyn, – dedi emhana dırektory.
Jastar saıasaty basqarmasynyń basshysy Marat Jurqabaev oblystyq densaýlyq saqtaý basqarmasy ótinish bildirgen soń, saǵat 11-ler shamasynda áleýmettik jeli arqyly emhanalarǵa erikti azamattardyń kómegi kerek ekenin jarııalaǵan. Aınalasy 3 saǵattyń ishinde 50 shaqty adam jınaldy. Kóbi ózderiniń jekemenshik kóligimen kelgender. Erikti bolý erikkenniń isi emes. Buryn eriktiler degen uǵymdy tek stýdent jastar dep qana túsinýshi edik, emhana aldyna jınalǵandardyń ishinde qyryqtyń qyrqasyna shyqqan qyrma saqaldar da júr.
Eriktiler jalpyǵa jarııalanǵan tótenshe jaǵdaı aıaqtalǵansha osy emhanalarda dıspanserlik tirkeýde turǵan qant dıabeti bar, júregi aýyratyn, aýyr otadan shyqqan jáne qozǵalýy qıyn ártúrli sozylmaly aýyr dertke ushyraǵan naýqastarǵa dári-dármek tasıtyn bolady.
Igi bastamaǵa biz de atsalysqymyz kelip edi, jolymyz bolmady. Bizden erterek baryp tirkelip qoıǵandar kóp eken. Bir kún ishinde dári-dármek aparylýy tıis mekenjaılar túgel qamtylyp qoıypty. Sondyqtan tizimge tirkelip, kezegimizdi kútetin bolyp kelistik. Osylaısha, búgingideı qaterli shaqta tek azyq-túlik alý úshin ǵana emes, jaqsylyq jasaý úshin de uzyn-sonar kezek kútýge týra keletinine kóz jetkizdik.
QOSTANAI