Joǵary oqý oryndary qashyqtan oqytý júıesine kóshkeli, aýylǵa oralǵan biraz stýdent keste boıynsha bekitilgen kúndelikti onlaın sabaqtarǵa qatysa almaı júr. Buǵan keıbir eldi mekenderde ınternettiń joqtyǵy sebep. Máselen, Qarabalyq aýdanyna qarasty О́rnek aýylyna Almaty, Pavlodar, Qostanaı, Nur-Sultan qalalarynda oqıtyn 6 stýdent oralǵan. Mundaǵy alty balaǵa Moodle júıesi arqyly onlaın dáris tyńdap, tapsyrmalardy ýaqtyly oryndaý, ony qaıta jiberý qıynǵa soǵyp otyr.
Aýyl turǵyny Tólen Ramazanulynyń aıtýynsha, О́rnek ınternet baılanysy aıasynan tys jatqandyqtan, mundaǵy el uıaly telefon ustamaıdy. Sondyqtan stýdentter oqý baǵdarlamasynda bekitilgen tapsyrmalardy ınternet arqyly ala almaı otyr. Ata-analar da «Balamyz erteń oqýdan shyǵyp qalmaı ma?» - dep alańdaı bastaǵan. Aýyldaǵy jalǵyz mektepte ınternet bar. Biraq onyń kúshi elektrondy poshtadan hat jiberýge ǵana jaraıdy, onlaın baılanysqa shamasy jetpeıdi.
О́rnektegi 6 stýdenttiń biri Súndet Sultanǵazın - Qostanaı memlekettik ýnıversıtetiniń 1 kýrs stýdenti. 16-sy kúni mektepke baryp, Moodle júıesine kire almaǵan stýdent: - Búgin ınternet istep tur, biraq jyldamdyǵy óte baıaý. Bir-eki tapsyrmany áreń degende júktep alyp, oryndap úlgerdim. Taqyryp boıynsha berilgen suraqtarǵa jaýap berip, ony pán oqytýshysyna kúndelikti jiberip otyrmasań, 0 upaı alasyń. Ol erteń kezeńdik baqylaýǵa keri áserin tıgizýi múmkin, - dedi.
Sebepti jaǵdaımen Moodle júıesine kire almaı, sabaq qaldyryp, kezeńdik baqylaý suraqtaryna ýaqytynda jaýap bere almaǵan stýdentke keshirim jasalyp, qaryzyn óteý merzimi uzartyla ma eken degen saýalmen Qostanaı pedagogıka ýnıversıtetiniń qashyqtan oqytý ortalyǵyna qońyraý shalyp edik, jaýap bolmady. Amalsyz oqytýshylarǵa habarlastyq.
- Baǵdarlamashylar eki kún qatarynan Moodle júıesimen qalaı jumys isteý kerektigin úıretti. О́te qıyn emes. Keste boıynsha kompıýter arqyly onlaınǵa shyǵamyz. Kádimgideı bir-birimizdi kórip otyramyz. Stýdentter túsinbegenin surap otyrady. Bireýdiń mıkrofony istemeıdi, bireýdiń veb-kamerasy joq. Biraq chatqa shyǵa alady. Stýdentke osy úsh túrli baılanystyń qaısysy yńǵaıly, sabaqty sonymen ótemiz. Stýdentterdiń deni baılanysqa smartfon arqyly shyǵatyndyqtan, bet-júzin kóbine kórmeımin, biraq olar meni estip otyrady. Túsinbeı qalǵanyn chat arqyly suraıdy. Aty-jóni shyǵyp turady, sol arqyly suraq ıesine jaýap beremiz. Al stýdenttiń jaýabyn avtomattandyrylǵan «Platonýs» júıesi arqyly baǵalap jatyrmyz. Keıbir aýyldarda ınternet durys istemeıdi. Soǵan baılanysty qolaısyzdyq bar. Keıbir balalar onlaın sabaqqa qatysa almaı jatyr. Eger aýylynda ınternet bolmasa, olarǵa jeńildik jasalatyn shyǵar, - dedi О́.Sultanǵazın atyndaǵy QMPI-dyń aǵa oqytýshysy Murat Jumash.
Aýylda ınternet bolmaǵandyqtan, qalada qalǵan stýdentter bar. Máselen, Nur-Sultandaǵy medısınalyq ýnıversıtettiń stýdenti Raýshan Tasanova osy onlaın sabaq úshin Qostanaıdaǵy týysynyń úıinde jatyr. Aıtýynsha, ózine osy yńǵaıly. Ákesi Bektemirge qońyraý shalyp edik:
- Qyzym úıge jete almaı jatyr ǵoı, - dedi.
Ne bolsa da, búgingi jaǵdaıda balanyń úıde, áke-sheshesiniń kóz aldynda otyrǵany durys. Onlaınǵa shyǵý ońaıǵa soqpaıtyn eldi mekenderde turatyn stýdentter kóp emes qoı. Bilimniń berekesi ketip, balanyń júıkesi tozbaı turǵanda, sabaqtan ýaqytsha bosatyp, olarǵa avans túrinde demalys bergen de durys sııaqty.
QOSTANAI