Almaty qalasy Qoǵamdyq densaýlyq saqtaý basqarmasynyń basshysy Tileýhan Ábildaev Almatyda vırýs juqtyrǵandardyń kimder ekenin aıtty.
«Qazirgi ýaqytta Almatyda juqpaly aýrýlar aýrýhanalarynda koronavırýstyq ınfeksııa rastalǵan 22 pasıent bar. Úsheýiniń biri qala turǵyny. Ol shetelden kelgen azamattarmen baılanysta bolǵan. Qurǵaq jótel, tamaqtyń qyryldaýy, keýde tusynyń aýrýy, qulaqtyń bitelýi sııaqty sımptomdarǵa baılanysty 18 naýryzda odan koronavırýsqa laboratorııalyq taldaýlar alyndy. О́kinishke oraı, keshe oń nátıje aldyq. Pasıent dereý stasıonarǵa oqshaýlandy», dedi Tileýhan Ábildaev.
Sondaı-aq ol indet juqtyrǵan ekinshi naýqas Berlın-Almaty chartelik reısiniń bort-serigi ekenin málimdedi.
«Koronavırýs rastalǵan ekinshi pasıent Berlın-Almaty chartelik reısiniń bort-serigi. Ol ushyp kelgen kúnnen bastap, ıaǵnı 12 naýryzdan beri juqpaly aýrýlar aýrýhanasynda karantınde boldy. Sondaı-aq úshinshi adam 1997 jyly týǵan er adam 19 naýryzda túnde Parıj-Mınsk-Almaty reısimen ushyp kelgen. Ol provızorlyq gospıtalge karantınge tústi. Búgin qalalyq juqpaly aýrýlar aýrýhanasyna aýystyryldy», dedi ol.
Onyń aıtýynsha, búgingi kúni 20 naýqastyń densaýlyq jaǵdaıy qanaǵattanarlyq. Al eki adamda aýyrlyǵy ortasha. Qazirgi tańda qalanyń provızorlyq gospıtalinde 696 adam, úı karantıninde 1108 adam medısınalyq baqylaýda jatyr.