Soltústik Qazaqstan oblysynyń Densaýlyq saqtaý basqarmasyniń ókili óńirdegi koronavırýs juqtyrǵan adamnyń jaı-kúıin aıtty.
"Habar 24" arnasynda bolǵan brıfıngte basqarma basshysy Tımýr Sultanǵazıev 1993 jylǵy qyz Petropavlǵa Omby qalasynan kelgenin habarlady.
"Ol 23 naýryzda keshke tranzıttik poıyzben kelgen. Vokzaldan úıine jetken, biraq dalaǵa shyqpaǵan, tek anasymen baılanysta bolǵan. Kelesi kúni, 24 naýryzda dene qyzýy 37,6 gradýsqa kóterilip, jedel medısınalyq kómekke júgindi" dedi ol.
Ol jedel medısınalyq járdem brıgadasy shaqyrýǵa tolyq qorǵanys kostıýminde kelgenin atap ótti. Keıin qyz provızorlyq stasıonarǵa jatqyzyldy.
"Dıagnoz koronavırýs ınfeksııasynyń bar ekenin anyqtady. Qosymsha taldaýlar Almaty zerthanasyna jiberildi" dep tolyqtyrdy Tımýr Sultanǵazıev.
Qazirgi tańda pasıenttiń jaǵdaıy qanaǵattanarlyq.
"Temperatýra joq, shaǵym aıtpady. Onymen baılanysta bolǵan poıyz jolaýshylary da anyqtaldy. Olardyń barlyǵy karantındik stasıonarda oqshaýlandy, zerthanalyq taldaýlar alyndy. Barlyǵynyń jaǵdaıy qanaǵattanarlyq" dedi oblystyq Densaýlyq saqtaý basqarmasynyń basshysy.
Eske salaıyq, búginde Qazaqstanda 79 adam koronavırýs juqtyrǵan.